Boy ug Maid

Gula 2

Kalit nga napalingi si Lino sa iyang luyo aron pagsusi kun unsay nakaingon sa kasikas nga iyang nadungog. Apan ang bayhon ni Precy maoy iyang nakita.

“Uy, ikaw man diay na Precy. Wala ka pa usab diay matulog?” ni Lino pa nga daw nahuwasan sa kakulba kay abi niya’g unsa na ang kasikas nga diha sa iyang luyo.

“Giganahan lang ko nga magsud-ong sa hayag kaayong buwan Lin mao nga wala pa ko duawa’g duka,” pasabot ni Precy ngadto sa bag-o niya nga kauban sa balay.

Nakapahiyom si Lino nga nakadungog sa daw balaknon nga pamahayag sa maid nga si Precy. “Taga diin ka diay Prec? Nakalimot ko’g pangutana nimo ganina.”

“Sa Liloan, Southern Leyte g’yud ang among lugar Lin. Ngano diay?” nakapangutana ang dalaga. “Tungod kay balaknon man gud kaayo ang imong sinultihan Prec.”

Nagkalingaw silang duha og sultihanay, nagsuginlanay sa ilang mga kaagi. “Susama diay kita og tumong Prec, dia kita dinhi sa magahob nga dakbayan kay nanimpalad.”

“Uy, gabii na man diay kaayo Lin, matulog na ko ha, ikaw lakaw na sa imong kwarto sa tupad sa grahe,” giingnan ni Precy si Lino og dayong lakaw niya paingon sa iyang kwarto duol sa kusina.

Kadto maoy sinugdanan sa ilang panagsuod. “Duna unya ko’y itug-an nimo Lin kay basin makatabang ka nako pagsulbad sa akong problema,” ni Precy pa usa niana ka buntag nga nagkasultihanay sila og ang ulitawo.

“Sure, tawga lang unya ko Prec kun gusto ka na nga imo kong tug-anan,” matud ni Lino.

Usa ka buntag nga nanglimpyo si Lino sa sakyanan sa iyang agawon, giduol siya ni Marco. Daw sa iyang tan-aw may gihambin kini nga kasuko kaniya.

“Nabantayan nako nga kanunay kamong magsultihanay ug si Precy panahon sa kagabhion Lino, nangulitawo ka ba niya?” pintok ang sinultihan ni Marco ngadto sa iyang boy.

Nakalitan si Lino sa iyang nadungog. “Wala Sir uy, nagsultihanay ra ming duha pawala sa kalaay kay mingaw man gud dinhi sa balay nga walay laing ikasulti.”

“Gikan karon likayi na ang pagpakigsulti kanunay ni Precy ha, ilabi na panahon sa gabii,” matud ni Marco sa wala pa kini mobiya ni Lino.

Wala makasabot si Lino kun nganong gidid-an siya ni Sir Marco niya nga makigsulti kang Precy. Usa ka adlaw, dihang nakabiya na si Marco paingon sa trabaho, gitawag si Lino ni Precy didto sa kusina.

“Duna ko’y itug-an nimo Lin, tabangi ko kun unsay akong buhaton,” ni Precy pa. (Sumpayan)