Nahinumdom siya sa nahitabo kaniya kagabii. Kusog kaayo ang iyang takig. Gigakos iya’g hugot ni Jeffrey ug ang kainit sa lawas niini maoy nakapahuwas sa iyang gibati.
Gipangita niya si Jeffrey. Iya kining nakaplagan nga naligo sa may tubod. Ang katunga sa lawas niini nahumol sa tubig.
Wala mopaduol si Danica. Mihunong siya sa paglakaw ug nagbarog sa igong gilay-on gikan sa tinubdan. Gilingaw niya ang iyang kaugalingon nga nagtan-aw kang Jeffrey nga naligo sa tubod nga wala pa gayod makamatikod kaniya.
Takulahaw lang nakalingi si Jeffrey sa iyang nahimutangan. Ingon kini sa nakugang pagkakita kaniya.
Apan kadiyot ra ang maong kahikugang. Mibanos pagbathay ang pahiyom sa panagway sa ulitawo. Mikaway kini kaniya. Mibalos usab siya pagkaway ngadto niini nga giubanan pa niya og matam-is nga pahiyom.
“Kaganina ka ra ba diha?” Pangutana sa ulitawo.
“Dili pa lang dugay,” mubo niyang tubag.
Mipadayon pagkaligo si Jeffrey. Ingon sa wala usab mobati og kapuol si Danica nga nagtan-aw niini nga naligo. -- Sumpayan pa