Balik sa gibiyaan nga kalibotan

Ingon sa naluya ang iyang diwa sa pag-abot ni Deling sa iyang hunahuna. Napandol ang iyang kahinangop. Napukgo ang iyang kalipay. Mikabayo kaniya ang kahisagmuyo. Sa gipakitang kinaiya ni Deling kaganina atubangan sa grasya, nakaseguro siyang wala kini mahimuot sa iyang pagpakigkita kang Pasyo. Wala siya makaagpas sa lintunganay’ng hinungdan. Pero dihay hanap nga panaghap nga milandong sa iyang hunahuna. Tingali tungod kay siya lahi na sa kanhing Gener. Ang Gener karon nanag-iya na og patik nga sama sa naangkon ni Cain. Dihay daghang bulok sa pangagpas nga mibangaw sa iyang kaisipan. Kun dawaton niya ang tanyag ni Pasyo, nagtuo siyang dili kini ikahimuot ni Deling.

Midumbol kaniya ang kabalaka. Basin unya’g siya pa ang mahimong hinungdan sa away nilang magtiayon. Lahi ang Deling nga iyang nailhan kaniadto ug ang iyang nakita karon. Sama sa kausaban sa kinaiya ni Saul sa nahimo na kining hari ang nakita niyang pagkabalhin sa batasan sa iyang kumare. Sama usab sa kalainan sa kinaiya ni David ug Faraon ang iyang pagtandi sa gawi sa kinabuhi sa iyang kumpare ug kumare.

“Dili lang ko, Pre,” miuna siya pagbalibad bisan sa iyang hunahuna mitabikong ang kahinugon pagwakli sa tanyag.

“Ngano man, Pre?” sukit ni Pasyo nga matingad-on. “Maayo na lang kini samtang wala ka pay permanenteng trabaho.”

“Husto ka, Pre” niya pa. “Dako unta’g ikatabang nako ang imong tanyag. Pero dili na lang ko mopahinayak.”

“Sa unsang katarongan?” ang pangutana ni Pasyo nangayo og katin-awan.

Ku-kuan man gud, Pre,” niya pa nga dali rang nakabunlot og katarongan. “Dili nako makaagwanta’g tugnaw. Ilabi na kun sa gabii ta managat.”

“Aw, sa gabii gyud hinuon ang atong ipalawod,” ni Pasyo. “Ug buntag na sab tang mahiuli.”

“Tiaw mo kana,” niya pa human masuta nga may kalig-on ang gipabarog niyang pamakak. “Dili gayod diay ko magsilbi nianang trabahoa.”

“Sa ato pa, mobalibad ka gayod?” Gipahunat siya sa pangutana.

“Oo, Pre,” mubo niyang hukom.

“Buyno, ikaw ang mag-igo,” ni Pasyo pa. Gusto man gud unta kong makatabang nimo. Pero kun dili masugakod sa imong lawas, ayaw pugsa. Lawas ra bay atong puhonan. Aw, kun may kinahanglanon ka, ayaw lang kataha pagduol nako. Kita na gud ni!”

“Daghang salamat, Pre.” -- Sumpayan pa

Maunongon ang gugma

Ni Rosalie Vallecera

Resulta na kini sa ilang pagpasinguwan kaganinang adlawan. Nagmahay na hinuon si Jeffrey kun nganong misugot siya nga mokuyog si Danica kaniya sa pagpangayam og manok ihalas.

Gihugtan pa gayod ni Jeffrey ang paggakos niya ni Danica. Iya kining gisapupo ug gipalingkod sa iyang duha ka paa aron dili siya maglisod sa paggakos sa dalaga. Hugot kaayo ang iyang pagbilanggo niini sa iyang mga bukton.

Dihay langyaw’ng pagbati nga inanay nga mikuyamang sa lawas ni Jeffrey samtang gigakos niya si Danica. Apan mipatigbabaw gayod ang dako niyang kahingawa sa kahimtang sa dalaga. Naluoy siya niini.

Dangtan og pipila ka gutlo, namatikdan ni Jeffrey nga inanay nga mikalma ang pagkurog ni Danica. Ingon sa inanay na kining naulian. Unya paglabay sa lain pang mga gutlo, mao na lamay naamgohan ni Jeffrey nga nahikatulog na si Danica diha sa iyang mga bukton. Samtang iya kining gisabak.

Gihinay ni Jeffrey sa pagpahimutang si Danica sa salog nga gihapinan lang niya sa iyang jacket. Wala man gud sila’y banig. Nag-amping siya nga dili mahigmata si Danica sa iyang pagbutang niini sa salog. Gipaunlan niya niini ang iyang bag. -- Sumpayan pa