Maunongon Ang Gugma

Gula 71

Taudtaod nang nakatulog si Jeffrey dihang kalit lang siyang nahipugwat. Maoy iyang namat-an si Danica nga nag-agulo. Mibangon siya ug miduol sa gihigdaan sa dalaga.

Sa dan-ag sa kuwap nga kahayag sa lamparilya, nasuta ni Jeffrey nga nagkurog si Danica sa katugnaw. Init kaayo ang agtang ug liog niini sa dihang iyang gitapin-an. Gitakigan si Danica!

“T-tabangi ko, Jeff,” nagkurog ang mga ngabil ni Danica samtang namulong. “T-tugnaw kaayo...”

Naluoy si Jeffrey nga nagtan-aw sa kahimtang ni Danica. Sa makadiyot gipuga niya ang iyang hunahuna kun unsay angay niyang buhaton. Ania sila sa taliwala sa dakong lasang. Layo kaayo sa doktor sa lungsod. Wala usab sila’y dalang tambal. Mao nga nabalaka pag-ayo si Jeffrey sa kahimtang ni Danica.

Nakabantay si Jeffrey nga misamot ang pagkurog ni Danica. Wala nay laing nahunahunaang paagi si Jeffrey. Gigakos niya si Danica sa pamasin nga pinaagi sa kainit sa iyang lawas mahupay ang gibating katugnaw niini.

Wala mopakita’g pagtutol si Danica sa dihang gigakos kini ni Jeffrey. Nagkurog kini sa labihang katugnaw. Apan init kaayo ang lawas niini. Gitakigan gayod og maayo si Danica. Gihilantan! -- Sumpayan pa