Kadtong ambus didto sa Basilan

Usa ka Muslim si Calil nga nagpuyo sa usa ka barangay sa Cotabato. Bisan tuod kung usa siya ka Muslim, ang iyang panglantaw sa kinabuhi, morag usa siya ka Kristiyano. Usahay mokomedya siya ngadto sa iyang mga higala pinaagi sa pag-ingon nga tingali kuno nga nasayop si Allah sa pagbuhat kaniya kay usa siya ka Muslim apan ang iyang simpatiya daw usa siya ka Kristiyano.

Daghan mga higayon didto sa ilang dapit makighinabi siya sa mga Muslim nga iyang mga higala ug siya mosulti nga dili tinuod ang pag-ingon nga basta Kristiyano, daotan.

“Abi ninyo, Nari, naay mga Kristiyano nga daotan sama usab nga dunay mga Muslim nga daotan,” pulong ni Calil. “Ang tanan nagdepende sa binuhatan sa matag usa.”

“Apan, ang problema kanimo kay morag pabor ka sa mga Kristiyano,” pulong sa higala ni Calil. “Kitang mga Muslim, kinahanglan magpaka Muslim kita aron dili kita daugdaogon sa mga Kristiyano. Ato kining Mindanao ug angay nga atong pakamatyan hangtod kita mamatay.”

“Abi ninyo mga Nari, kining Mindanao ato kining tanan isip mga Pilipino. Dili maayo nga moingon kita nga dili kita mga Pilipino.”

Nahimong mainit ang mga panaglantugi ni Calil sa iyang mga higala nga lunod-patay gayod nga Muslim. Dunay mga higayon nga moingon ang mga higala ni Calil nga dili sila mga Pilipino ug kuno sila mga Arabo.

Usa kadto ka adlaw nga dunay ambus nga nahitabo sa Basilan ug ang usa ka biktima usa ka sundalo nga ig-agaw ni Calil. Naguol kaayo ang pamilya ni Calil. Miadto si Calil aron pagsuta kun unsa ka tinuod ang balita, head kuwartel sa kasundalohan ug didto, gisultihan si Calil bahin sa ambus ug naseguro niya nga ang iyang ig-agaw usa sa mga biktima. Halos mahugno ang ilang kalibotan tungod sa maong panghitabo. Unya human malubong ang ig-agaw ni Calil ngadto sa iyang lubnganan, miadto si Calil sa head kuwartel aron mopresentar siya nga magsundalo dili aron ipanimalos ang kamatayon sa iyang ig-agaw kun dili aron makaalagad sa gobyerno.

Daghan sa mga higala ni Calil ang nasuko nganong nagsundalo siya. Maayo pa kung misulod siya sa MILF.

“Nari, ako kining katungod,” pahayag ni Calil. “Para kanako, maayo na lang kung mosulod ako sa pagka sundalo kay sa mosulod ako sa MILF.”

Walay nahimo ang higala ni Calil sa iyang baroganan, taliwala nga nasuk-an siya sa iyang mga higala. Husto ang iyang baroganan nga maayo pang magsundalo kay sa mosulod sa MILF. (Kataposan)