Artikulo

Sa matag komunidad, ang tubig maoy usa sa nag-unang gikinahanglan sa mga tawo. Mao man gani nga ang mga opisyal sa komunidad nagtinguha gayod nga kahatagan og tubig ang mga nagpuyo sa ilang dapit.

Obligasyon sa mga lumolupyo ang pagbayad sa gisuplay nga tubig. Sa among lugar sa Sogod partikular na sa Barangay Poblacion, adunay pipila nga naputlan sa suplay sa tubig kay wala makabayad sa binulan nga obligasyon. Napasagdan sa pagbayad kaha tungod sa kalisod pangitaon sa kuwarta karong panahona.

Ang nahitabo, napunpon ang mga balayranan hangtod nga nadako na kini. Lisod nang sagubangon sa pagbayad ilabi na niadtong naglisod sa pagpuyo ug adunay mga anak nga gipatungha sa hayskol o kaha sa kolehiyo. Tungod niini, gipursige na sa pagpabayad sa mga namuno sa lungsod sa Sogod ang mga lumolupyo nga wala makabayad sa binulan nga balayranan sa tubig, madagko man o magamay nga kantidad pinaagi sa sistema nga compromise.

Ang bayran una mao ang 25 porsiyento unya ang balanse bayran sa sulod sa napulo ka bulan. Adunay nagpatalinghog niini mao nga wala sila kaputli sa munisipyo og suplay sa tubig. Apan ang uban nga wala magtagad niini, naputlan gyud sa suplay sa tubig.

Kun buot gayod hunahunaon, obligasyon natong nagpuyo sa usa ka komunidad ang pagbayad sa binulan nga bayranan sa tubig. Unsa may ipalit og mga tubo nga ipuli sa nangabuslot nga mga tubo? Usa lang kini sa mga rason nga angayan nga mobayad ang mga nagpuyo sa usa ka komunidad aron magpadayon ang pagserbisyo alang sa tubig.

Hinuon, angayan usab sabton sa mga opisyal sa usa ka komunidad kun ang usa ka pamilya dili dayon makabayad sa tubig ngadto sa munisipyo tungod sa kalisod sa pagpuyo, o kaha niadtong pamilya nga naapikehan gayod sa kuwarta tungod sa gipatungha nga mga anak.

Angayan lang nga tan-awon ang estado sa pagpuyo sa usa ka pamilya.