Balik sa gibiyaan nga kalibotan

Gula 24

Ingon sa naanod silang duha sa kalimbatianon sa higayon. Sa misunod nga mga gutling, mao na lamay ilang naamgohan nga gitambayayongan na nila pagsaulog ang sulundong ritwal sa gugma.

Buntag sa sunod adlaw, sayong milakaw si Gener. Maoy iyang tumong ang Sitio Linaw, ang gipuy-an ni Pasyo, ang iyang kompare. Siya’y nagkugos sa panganay nga anak nila ni Deling, asawa niini. Namasin siya nga makatunol og tabang ang iyang kompare kaniya.

Pero gidemalas siya. Wala na diay magpuyo sa Sitio Linaw ang magtiayong Pasyo-Deling. Nagpakisusi siya. Iyang nasayran nga milalin na ang magtiayon ngadto sa Sitio Pangpang. Nahadlok sila sa nagbahis nga mga walhon nga magdansohan sa maong dapit. Maong mihinihan sila pagbalhin ngadto sa Pangpang.

Gisum-ok ni Gener ang Sitio Pangpang. Suheto siya sa maong dapit tungod kay iya kining tugkaran sa ulitawo pa siya. Apan iyang nasuta nga may kausaban na ang maong dapit. Kaniadto talagtag kaayo ang kabalayan sa Sitio Pangpang. Maihap lang tingali sa tudlo. Apan karon dasok na sa kabalayan ang maong sitio. Sa iyang nakita, dihay butang milugdang sa iyang hunahuna. Malagmit dinhi molalin ang mga lumolupyo sa bukirang bahin sa Lumangog nga natugaw sa pagdagsang sa mga rebelde sa kabukiran.

Gipangita dayon niya ang balay sa magtiayong Pasyo-Deling. Nagpangutana siya. Ang iyang gipakisayran lain og tinan-awan kaniya. Nasakpan niya kining mipasigpat sa iyang patik. Apan mitug-an kini sa matuod. Wala siya maglisod pagtultol sa pinuy-anan sa magtiayon.

Iyang naabtan ang magtiayon nga namahaw uban sa ilang mga anak. Nakugang si Pasyo pagkakita kaniya. Apan mibati kini’g kahinangop. Iyang nabatyagan nga kinasingkasing ang pag-abi-abi ni Pasyo kaniya. Lahi sa ubang mga tawo nga iyang gikabagat nga uga kaayo’g tinagdan kaniya. Hinuon, namatikdan niya nga mopasigpat usab kini’g panagsa sa iyang patik apan nianang tinan-awan nga wala’y malisya. Wala siya’y nakitang bulok sa pagpakaaron-ingnon sa tinagdan niini kaniya. Apan dihay iyang namatikdan sa asawa sa iyang kompare. Lawhag ug uga ang timbaya nga gidalit ni Deling kaniya. -- Sumpayan pa