Ang trato nga engkanto

Labada ang trabaho ni Esmeralda sa iyang agalon nga si Marlon. Kini si Marlon may pagka-ugis ang puti niyang nawong tan-awon.

Adunay moingon usahay nga siya kaliwat sa usa ka engkanto. Ulitawo pa kini si Marlon, nga nagpuyo sa balay nga tisa nga iyang nasunod sa iyang inahan, nga si Esterlita nga kaliwat sab sa katsila.

Si Esmeralda, usa ka bukidnon nga dalaga. Anak siya ni Benita ug Donato nga usa lamang ka timawa nga mag-uuma.

Tungod lagi sa kapobre, misulod siya sa pagka-sulugoon sa ilang balay ni Marlon. May mga kauban usab siyang laing mga sulugoon. Sila si Marta nga usa ka kosinera. Si Luisa nga usa ka hardinera. Siya ang tig-atiman sa mga tanom nga kabalaka-an.

Samtang si Esmeralda, ang paglaba ra gayod sa mga sapot ni Marlon. Ingon man sa tanan niyang mga biste nga kinahanglanon. Matahom si Esmeralda. Ug si Marlon hilom usab nga nangandoy kaniya.

Tungod sa kadako sa balay nga tisa, ang tulo ka mga sulugoon nag-apod gayod og mga kuwarto sa silong.

“Es, puwede ba nga makigsulti una karon kanimo,” giingnan siya ni Marlon nga kaniya mapahiyomon. “Hinaot pa unta nga dili mo ako karon balibaran.

“Bahin sa unsa man kana akong agalon?” tubag ni Esmeralda, nga mapahiyomon “sultihi lang ko. Kay maminaw ako kanimo!”

“Gihigugma ko ikaw Es. Basta mosugot ikaw kanako, pangandoy ko nga ikaw mahimo ko unta, nga asawa!” ni Marlon pa nga mitutok ni Esmeralda.

“A-apan a-agalon...i-imo lang tawon akong ulipon. Dato ka...pobre kami... mahimo kaha na?” ni Esmeralda pa, sa ahat apan maulawon nga mikatawa.

“Tinuod na Esmeralda. Apan tinuod gayod nga ikaw akong gihigugma!” ni Marlon pa, nga kalit lang migakos sa dalaga.

Igo lang si Esmeralda nakayango sa iyang ulo. Ug nagkatrato gayod sila niadto nga gabhiona. (Kataposan)