Bugti sa Pagbudhi

Gula 7

Human sa duha ka hugna sa ilang kumbati sa kama, gipasiga ni Melo ang suga sa kwarto. Nagbukot sa habol si Lita kay mauwaw siya nga makita ang hubo niyang lawas nga hayag na kaayo ang lawak. Takulahaw lang nga nakapahiyom si Melo.

“Lit wala g’yud ko magtuo nga ako pa diay ang lalaki nga nakauna pag-angkon nimo. Naa ay klaro kaayo ang mga lama nga anaa sa habol nga imong gilukob,” ni Mel pa nga mihawok pagbalik sa dalaga. “Mao lagi, unya duwa-duwaan lang ko nimo. Mao tingali nga gibiyaan ko sa akong boyfriend Mel kay wala man g’yud ko misugot sa iyang hangyo nako,” ni Lita pa.

Mibiya sila sa Kingsland Motel sa Tabunok. Mihunong si Mel atubangan sa usa ka naninda og painit daplin sa karsada sa SRP. “Kasuk-an na g’yud ko nila ni Mama karon Mel kay nabuntagan ko’g uli,” ni Lita pa nga may sagol kabalaka ang tingog.

Gihatud ni Mel si Lita sa ilang balay. “Sige na biyai na ko Mel kay mauwaw ko nimo nga kasab-an nilang Papa,” giingnan ni Lita si Melo. “Dili mahimo Lit, atubangon nako ug pasabton ang imong mga ginikanan.”

Tuod, nabasa ni Lita nga suko kaayo’g dagway ang inahan nga misugat kaniya. “Diin ka man Day nga buntag na man hapit? Kinsa ba kining imong kauban?”

Taud-taud, migawas ang amahan ni Lita ug sama gihapon kini nga suko kaayo og panagway. Nagduko si Lita nga wala magtingog. Si Melo na ang mitingog.

“Maayong buntag Nong, Nang. Boyfriend ko ni Lita, dugay na kaayo nga wala kami magkita ug dihang nagkita mi ganina nakigpanuroy ko niya, nagdisco mi ug mao nga nakalimot sa oras. Sori kaayo Nong, Nang. Aw yuna, nagkasabot na diay mi nga magminyo na sa labing dali nga panahon,” ni Melo pa.

Nakalitan si Lita sa iyang nadungog. “Maayo kong tawo Nong, Nang. Maayo unta’g dawaton ko ninyo nga mahimo ninyong umagad,” dugang ni Mel. Kuwartahan diay kaayo ang pamanhonon ni Lita. Gani sa gikasabotan, engrande ang ilang kasal nga apil sa moluhod kanila mao sila si Mayor Michael Rama, kanhi Konsehal Joy Pesquera, magpapatigayon Rene Mercado ug ang asawa niini nga si Dr. Lucelle Mercado.

Sa adlaw sa kasal. Sangko sa langit ang kalipay nga gibati ni Lita dihang migawas na sila gikan sa simbahan. Daghang nanglamano ug napahunong si Lita kay usa nga milamano kaniya si Jose, ang kanhi niya boyfriend nga naghilak. Nahibaw-an ni Lita nga wala diay madayon ang kasal ni Jose ug sa iyang pangasaw-onon. (Kataposan)