Gula 6
Nagkatinutokay silang duha si Lita ug Melo dihang didto na sila sulod sa kwarto sa motel. “Gikuyawan ko Mel. Basin dugangan ra nimo ang akong kasakit,” mabalak-on kaayo ang tono sa sinultihan ni Lita.
“Kuwang ka pa ba diay og pagsalig kanako Lit?” abtik kaayo nga nakatubag si Melo aron sa pagpalig-on sa pagsalig ni Lita kaniya. Wala maglangan si Melo, giparaygan niya si Lita.
Wala na magduha-duha si Lita pagsukol ni Melo sa pagparayganay ibabaw sa kama ug kalit lang nga namingaw ang tibuok lawak sa motel. Nabantayan ni Melo nga gipiyong ni Lita ang iyang mga mata wala’y hunong niya kini nga giromansa.
“Mel…Mel,” wala kapugngi nga nalitok ni Lita ang ngalan ni Melo dihang gisugdan na sa lalaki ang pagpanangtang sa mga salimbong sa iyang lawas. “Lit, I love you,” ni Melo pa sa dayong balik niya pag-ukob sa mga ngabil sa dalaga.
“I love you too, Mel.” Pareho nga naghangos sila si Melo ug Lita human sa kapin sa tunga sa oras nila nga pagparayganay.
Dayon, nabantayan ni Melo nga naghinuktok si Lita ug ang mga mata didto gipunting sa kisame. Taud-taud niya kini nga gipanid-an. “May nakahasol ba sa imong huna-huna Lit?” gipangutana ni Melo si Lita dihang iya kining gigakus.
Miginhawa’g lawom si Lita, dayon gihurot niya’g pagawas ang hangin nga iyang gihanggap. “Nahadlok ko nga sa kasayon-sayon ra nako nga pagtugyan sa akong pagkababaye nimo, magtoo ka nga ubos ra ko nga pagka-babaye.”
“Wala ko masayod kun ngano nga gaan kaayo ang akong buot kanimo Mel. Kun nganong sayon-sayon ra ko nga miuban kanimo,” may pagka-seryoso ang sinultihan sa dalaga.
Gihapohap ni Mel ang dughan ni Lita. Dayon ang kamot ni Mel nasangit sa daw duha ka bungtod sa dughan sa dalaga. Gikan sa pagka seryoso nga dagway ni Lita, kalit kini nga miagik-ik. “Gilokkk!”
Inay mohunong, daw migara hinoon si Mel ug gipabatyag pa og dugang kagilok ang dalaga nga sa ngadto-ngadto maoy nagsugnib og kainit sa pagbati ni Lita.
Nagginaksanay sila pag-usab ug nag-ukobay pagbalik ang masi’g nila ka mga ngabil. Mihilom pagbalik ang tibuok lawak sa motel diin ang hangos sa duha maoy panagsa nga motugaw sa kahilom.
“Mel…Mel, I love you,” gigakus paghugot ni Lita si Mel. (Sumpayan)