Sayo pa gani kaayo sa buntag, mo-kiring dayon ang imong telepono, ug inig tubag nimo, tingog ni Talisay City Councilor Danny Caballero ang imong mabati kun mabutang nimo siya sa imong lindog ug magpasalamat dayon sa imong gibuhat.
Ang buot ipasabot niana nga matag buntag mobasa siya sa mga pamantalaan ug mapasalamaton kanunay sa iyang mabasa diin anaa ang iyang ngalan bisa’g usa ra ka linya ang iyang mabasa bahin niya.
Sa miaging Sabado, Nobiyembre 12, siya ug ang iyang buotang asawa nga si Peanut, nagluhod og kasal. Halos matag semana, magluhod og kasal ang magtiayon dili lang sa Talisay City kun dili sa ubang lugar sa dakbayan.
Ngano? Tungod sa dili malabwang PR kon public relations ang magtiayon. Matud pa sa ilang higala nga si Singer Julius Ceballos, ang PR di Dan matupngan tingali pero dili malabwan. Tuod, ang singer nga si Julius mao usab ang nagdala sa magsoong Danny ug Ehpoy Caballero sa programa sa INTV-CCTN, Channel 47 nga “Just Do Business.”
Ngano? Kay talagsaon usab ang paglambo sa negosyo nila ni Danny ug Ehpoy Caballero.
Sa miaging Domingo, Nobiyembre 13, abyerto ang gate nila ni sir Dan ug Mam Peanut samtang gipasalida ang away nila ni Manny Pacquiao ug Marquez. Kini tungod kay matag away ni Manny bukas ang ilang compound, aron makalibre og tan-aw ang mga silingan sa away.