Gula 5
Taud-taod g’yud nga giukoban ni Melo ang mga ngabil ni Lita nga karon iya na nga gisapnay ug hinay-hinay nga gipaunlan sa iyang paa. “Lit, hatagan nato og higayon ang tagsa-tagsa nato ka kaugalingon nga malipay human sa kapakyasan nato sa gugma,” matud ni Melo nga mihapohap sa kalawasan sa dalaga.
Wala motingog ang dalaga. Gihapyud-hapyod ni Melo ang iyang buhok ug dayon gihagkan ang aping niini, dayon giukoban na usab ang mga ngabil. Ang tuo nga kamot ni Melo nagpadayon paghapohap sa kalawasan ni Lita.
Hinay-hinay nga gibati sa dalaga ang kalalim sa gihimo kaniya ni Melo ug mao na kini ang migakus sa lalaki. “Mel, ayaw tawon ko’g pahimusli… ayaw na dugangi ang akong kapakyasan,” hinay nga giingnan ni Lita si Melo.
“Isaad nako nimo Lit, dili ko ikaw binuangan. Gituyo tingali sa Ginoo nga gibugto niya ang relasyon sa tagsa-tagsa nato nga gikarelasyon aron nga magkatagbo ang masi’g nato ka dalan,” matud ni Melo.
“Mel, I love you,” hugot nga migakus si Lita kang Melo. Sa makausa pa nag-ukobay pagbalik ang masi’g nila ka mga ngabil. Nakadasig kini ni Melo sa paghapohap sa kalawasan sa dalaga.
Mitindog na g’yud pag-ayo si Junior ug usahay maigo kini sa ulo ni Lita nga nag-unlan sa paa ni Melo.
Wala g’yud mopalag si Lita nga gipanghiram ni Melo ang iyang kalawasan. “Lit, ayaw ko’g balibari,” hagawhaw ni Melo sa dalaga. “Unsa man?” daw paraygon ang tuno sa tingog sa dalaga.
“Mamiya na ta dinhi ug manulod ta sa bugnaw nga lugar. Tana Lit, please ayaw ko’g balibari,” matud ni Melo nga mihapohap sa tiyan sa dalaga. Wala motingog si Lita nga nakasabot sa tumong ni Melo.
Mibangon si Lita gikan nga nagyaka sa semento nga kabahin sa karsada sa SRP nga nagtambo sa dagat. Giagbayan siya ni Melo paingon sa giparkingan sa kotse sa lalaki.
Misirit ang kotse ni Melo paingon sa Talisay. “Asa diay ta paingon?” nagpakisayud si Lita kang Melo. Wala danti og kinse minutos nakita ni Lita nga gipasulod ni Melo ang kotse sa Kingsland Motel sa Tabunok.
Diritso nga gipasulod ni Melo ang kotse niadtong grahe nga inablihan daan. Miduol dayon ang usa ka roomboy ug gisirad-an ang grahe. Nanaug dayon si Melo ug siya ang mibukas sa pultahan sa kotse ug gidawat ang kamot ni Lita.
“Dali na Lit, manulod na ta,” ni Melo pa nga miabli dayon sa pultahan sa lawak sa motel. (Sumpayan)