Kwarta na, nahimo pang bato

Napugos hinuon ko pagbangon sa dihang nabatian nako nga nagkalangas ang balay sa among silingan. Wala nalang gani nako hiposa ang akong gihigdaan ug mideretso ko’g abli sa bintana sa akong kuwarto. Dayon og panambo.

Mao gyuy nasugat sa akong panan-aw ang among silingan nga si Berto, nga nagsigi’g tamparos sa iyang asawa, nga hilabihan usab nga nakaminatay og hilak. Gisakitan tingali kini sa pagtamparos kaniya ni Berto.

“Naunsa ka ba Berto? Nganong gikulata man nimo kanang imong asawa? Unsa bay sala niya?” Mikalit og santa si Inse Loring, nga inahan ni Berto.

“Dako kaayo ni og sala Nay. Ug maayo pa gani kining patyon. Kay nagda lang kini sa buwisit,” ni Berto pa, nga hilabihang sukoa.

“Kay ngano man lagi. Unsa may nahimong sala ning imong asawa, nga buot man lang gani nimo kining patyon?” Gikan na usab kang Inse Loring, nga mipataliwala na gayud sa duha.

“Kuan man god Nay. Wala man god nako kabayri, ang gipaisyu niyang numero sa masyaw,” tug-an sa asawa ngadto sa iyang ugangan. Nga nagsigi gihapon og hapuhap sa iyang duha ka aping.

“Kana lang diay ang hinungdan, unya gusto mo nang patyon ang imong asawa?” Giingnan ni Inse Loring si Berto.

“Moingon ka lang niana Nay, kay wala ka man kahibawo kun pila untay madaog, kun nabayran pa niya ang numero nga akong gimentin. Nasayod ka na bitaw sa patakaran dinhi sa ato, nga “no pay, no win” man,” ni Berto pa, ngadto sa iyang inahan.

Sa dihang nakakanaog na gyud ko sa among balay, nasayran ko na gyud ang kinatibuk-ang hitabo, sa magtiayon nga si Berto ug Sheila Mae. Kun ang hinungdan nganong gikulata og maayo ni Berto ang iyang asawa.

Ang nahitabo diay, kini si Berto dunay gimentin nga numero sa masyaw. Ang numerong 1103. Kada adlaw magpaisyu gayud siya kang Jundel, sa maong kumbinasyon. Tag daghan ra ba kaayo ang iyang ipa-isyu. Moabot god usahay og 100 pcs. Makahimo man sa pag-isyu si Jundel sa maong gidaghanon, kay coordinator man kini sa masyaw.

Apan nianang milabay’ng adlaw, may gilakaw si Berto, nga importante kaayo. Maong iya lang gitugon ang iyang asawa, nga maoy pabayron sa kumbinasyon nga iyang gimentin, ngadto kang Jundel.

Pag-abot gayud ni Berto sa ilang balay nianang pagka-gabii, gipangutana dayon niya si Sheila Mae, kun nakapalit ba kini sa numero nga iyang gimentin. Apan mitubag ang asawa, nga wala kuno. Nagsugod dayon ang kasuko ni Berto, ngadto sa iyang asawa. Ug mibahad pa gani kini, nga patilawon gyud niya si Sheila Mae, sa iyang kumo, kun pananglit mogawas gayud ang kombinasyon nga 1103.

Kay tigpaminawan man si Berto sa resulta sa masyaw nga isibya sa radyo, sayo kaayo siyang nahibawo sa numero nga midaog sa masyaw. Misamot og ulbo ang kasuko ni Berto ngadto sa iyang asawa, kay ang numero man nga iyang gimentin maoy midaog.

Mao diay kadto ang hinungdan nga gipukaw niya’g kulata ang iyang asawa, nianang buntaga. Kay midaog man diay ang numero nga iyang gimentin. Ug ang nakaparat ra ba, kay wala diay kapalit ang iyang asawa sa maong numero. Unta, iya man kining gitugon sa dayon na niyang gikan.

Igo lang kong nakapanglingolingo ug nakaingon sa akong kaugalingon. “Kaanugon! Kwarta na unta, nahimo pang bato. Pagka wa gyuy suwerte ni Berto.” (Katapusan)