Maunongon ang gugma

Tuod, wala siya masayop. Didto gayod si Danica sa tubod. Apan kalit siyang napahunong sa dihang nagkaduol na siya sa tinubdan. Iyang nasuta nga naligo si Danica nga wala’y bisan diyotay’ng salimbong ang lawas.

Midali siya pag-ipli sa dakong punoan sa kahoy’ng magkuno samtang wala pa makakita si Danica kaniya. Nagtalikod ang dalaga maong wala kini makamatikod sa iyang pagsingabot.

Gikan sa punoan sa kahoy diin siya nagpasalipod, wala kalikayi ni Jeffrey ang pagsagop sa abilidad ni Peeping Tom. Gipanup-an niya si Danica nga naligo didto sa tubod. Ingon sa kompiyansa ra kini kaayong naghubo, daw wala gayod magdahom nga may mga matang nakakita sa hubo nga lawas niini. Wala hinuon makita ni Jeffrey ang atubangang bahin sa lawas sa dalaga sanglit nagtalikod man kini sa iyang nahimutangan. Apan wala gayod matago kang Jeffrey ang is-is nga pamanit ug ang kabigot sa lawas sa dalaga.

Naalimatmatan si Jeffrey. Nareyalisar niya nga dili maayo ang iyang gibuhat. Dakong sala ang iyang nahimo ngadto kang Danica. Mao nga midali siya pagbiya sa maong dapit ug mibalik ngadto sa payag samtang wala pa makamatikod ang dalaga kaniya. -- Sumpayan pa