Maunongon Ang Gugma

Gula 61

Iyang gipa-photocopy ang mga papeles ug ang journal. Uban sa video tape, iyang gipadala ang maong mga photocopies ngadto ni Col. Noot pinaagi sa fast courier. Gusto siyang makaabot ngadto ni Col. Noot ang maong mga butang sa labing daling panahon. Itugyan na niya ngadto sa koronel ang paghimo’g imbestigasyon kalabot sa Bangkulis Gang. Nakaseguro si Jeffrey nga dako’g ikatabang ang mga butang nga iyang gipadala ngadto niini sa pagahimuon nilang imbestigasyon.

Paggawas niya sa buhatan sa fast courier diin niya gipadala ang video tape, papeles ug journal ngadto ni Col. Noot, iyang gitawgan ang koronel. Iya kining gipahibalo nga gipadala na niya ngadto niini ang mga ebidensiya batok sa Bangkulis Gang.

“Paabota na lang ang maong mga butang, Sir,” giingnan niya ang koronel.

Wala siya makigsulti’g dugay sa koronel. Sa kataposang bahin sa ilang panagsulti sa cellphone, subli siyang gipahimangnoan niini nga mag-amping.

Wala si Danica sa pag-abot ni Jeffrey sa payag nga ilang gitagoan nga nahimutang sa taliwala sa lasang. Apan wala siya kulbai. Wala siya magduda nga gilayasan siya sa dalaga.

Gipangita niya si Danica. Maoy unang misantop sa iyang hunahuna ang pag-adto sa tinubdan. Namasin siya nga atua didto si Danica. -- Sumpayan pa