Gikaluy-an sa Birhen

Nag-ilaid sa kalisod ang kahimtang ni Victorino. Dili na paigo sa ilang panginahanglan iyang kitaon sa pagpamasahero sa traysikol tungod sa kadaghan sa mga nagbiyahe niining panahona. Gawas nga daghan na ang mga traysikol nga nagbiyahe gikan sa merkado publiko paingon sa barangay Bankal nga maoy iyang gipuy-an, nagkadaghan na usab ang mga multicab nga nagbiyahe sa pagpamasahero sa ilang dapit.

Mao na kana ang gipasidaan ko kanimo kaniadto Victorino,” mipasunding sa iyang hunahuna ang gipamulong sa iyang inahan. “Gipatungha ka namo kaniadto ni Papa ni Quintin nimo, wala ka mopadayon kay nakigminyo ka nianang Alona nga labaw pa sad nato kapobre ilang pamilya.”

Unsaon man, mutubag sa pagbagolbol si Victorino sa naibagolbol nga mipaingon sa kusina sa pagkaon sa iyang paniudto. “Pagbuot sa akong kapalaran nga siya maoy akong suwerte nga babaye nga akong giminyoan.”

“Suwerte sa imong kagaral!,” miyamiid iyang inahan. “Kadaghang babaye kun nakapadayon ka pa sa imong pagtungha ug nahimong abogado dili unta ang sama lang kang Alona ang babaye nga imong mapangasawa.”

Human sa pagpaniudto ni Victorino, nagdali kini sa pagsakay sa iyang gimaneho nga traysikol alang sa pagdala usab og pagkaon sa iyang asawa nga hapit na usab manganak niining panahona nga atua sa tambalanan.

Samtang nagdagan ang gimaneho niyang traysikol iyang napalandong ang gipamulong sa iyang inahan.

Husto si Nanay niya. Nagdali siya sa pagminyo ug mao kini karon ang iyang gidangatan. Nahimo niyang dakong suliran ang gikatakdang pagpanganak sa iyang asawa nga sisaryan.

Kini ang nahimo niyang suliran tungod kay wala man siya’y magamit nga kuwarta alang sa pagbayad ug hapit na niya mahurot sa pagpanghuwam og kuwarta iyang mga higala apan pulos usab kini mibalibad.

Gipahunong ni Victorino iyang traysikol sa atubangan sa simbahan ug human sa iyang pagpahiluna sa pag-parking miulod kini ug miluhod sa atubangan sa imahen sa Mahal nga Birhen sa Regka ug nag-ampo.

Human sa pipila ka gutlo sa iyang pag-ampo, nagdali kini sa paggawas alang sa pagbalik og pamasahero.

Dihang nakadagan na og pipila ka kilometro iyang paggawas sa simbahan maoy iyang nasugatan ang usa ka langyaw nga Hapon nga kuyog sa usa ka tawo nga iyang gituohang tourist guide.

Misakay kini sa gimaneho niyang traysikol ug nagpahatod sa usa ka beach resort sa barangay Marigondon sa maong dakbayan.

Human makapanganaug ang duha niya ka pasahero nagdali na usab kini sa pagbalik sa pagpangita pa og laing pasahero ug samtang nagdagan iyang traysikol maoy iyang nasigpatan ang bag nga gikarga sa luyo sa gimaneho niyang traysikol.

Gipahunong ni Victorino ang traysikol ug iyang nahimudoman nga gipanag-iya kini sa bag-o lang nga nanaug niyang pasahero nga iyang gihatod sa beach resort sa barangay Marigondon.

Gipabulhot og padagan ni Victorino iyang traysikol sa pagdagan og balik paingon sa nahimutangan sa nanganaug niyang pasahero alang sa pag-uli niini.

Sa iyang pag-uli sa maong mga butang nagdali kini sa pagsakay og balik alang sa pagpadayon sa iyang pagpamasahero.

Dihang gipaandar na unta niya iyang traysikol ug mopabulhot na sa pagpadagan maoy iyang nabati ang sampit sa tourist guide sa langyaw nga Hapon nga maoy tag-iya sa bag nga iyang giuli.

“Diay $100 dolyar nga gihatag sa Hapon kanimo.” Sa tourist guide pa. Pahalipay kini niya sa imong pag-uli sa nahibilin niyang bag nga adunay sulod nga mahalon niyang mga butang.”

Nagdumili unta siya sa pagdawat apan iyang nakita nga misinyas kaniya ang hapon sa pagdawat niini.

Nagdali sa pagbalik si Victorino sa tambalanan nga nahimutangan sa iyang asawa ug daw migaan na iyang gibati nga nasulbad iyang suliran sa panginahanglan og kuwarta ug dako iyang pagtuo nga gikaluy-an siya sa Mahal nga Birhen sa Regla. (Katapusan)