Balik sa gibiyaan nga kalibotan

Gula 14

Milusbog siya sa pagtugsaw sa tubig nga nagbaha sa katin-aw. Gihum-oy niya ang tibuok niyang lawas, sahi sa usa ka kabaw nga miligidligid sa lunangan aron pagpangita’g kahilwas sa kaugalingon. Nagtinguha siya’g katagbaw sa iyang kaugalingon sa kabugnaw sa tubig sa busay. Dugay na niyang giiliw ug gikahidlawan ang dalisaynong agos niini.

Human matagbaw sa pagkaligo, mipauli siya nga nagsaguod sa balde nga iyang gisudlan og tubig. Gidiretso niya kini sa kosina. Naabtan niya si Lucia nga naghikay na sa ilang pamahaw.

“Sayo ka man kaayong mibangon?” gisugat siya og pangutana sa asawa.

“Naligo ko’g sayo,” niya pa. “Nagmata na ba si Dodong?”

“Kaganina ra, uy,” maoy tubag. “Tua, akong gisugo pagpalit og buwad sa tindahan ni Iya Sidra. Mao ra man gayod kanay madali-dali dinhi sa ato.”

“Nahitalunong siya. May kahiamgo nga milugdang sa iyang kaisipan.

Nahiabot si Dodong gikan nga gisugo. Nagdala na kini sa buwad nga gipapalit sa inahan.

“Kaligo na Dong,” awhag sa inahan. “Mo-eskuyla ka ra ba karon.”

“Oo, Nay,” tubag sa bata.

Mikiros ang bata. Mikibad lang kini paingon sa busay.

Misulod si Gener sa suwambi nga wala mamatikdi ni Lucia. Nag-ilis siya og limpiyong sapot. Gisid-ing ang iyang kaugalingon sa salamin. Giayo’g huping ang iyang buhok. Namustora siya’g maayo.

“Asa ka man diay nga nag-ilis ka man?” sa asawa nga nakamatikod sa iyang pamiste sa iyang pagbalik sa kusina.

“Moadto ko sa lungsod,” niya pa. “Mosulay ko’g pangaplay og trabaho.”

Nahatutok ang iyang asawa kaniya. Gitutokan usab niya kini. Nagkatagbo ang ilang mga tinan-awan. Dihay kahingawa nga iyang nasihag sa kinidlap sa mga mata sa asawa. Namatikdan niya nga mipasigpat kini sa patik sa iyang bukton -- patik sa usa ka dragon! -- Sumpayan pa