Dili hilabwan ang iyang paagi

Buntag sayo, wala pa’y pamahaw nakumot ni Merlyn ang mantalaan nga iyang gibasa. Wala gihapon mahiapil ang iyang ngalan sa listahan sa nakapasar nga mga nars nga mikuha sa nursing eksaminasyon niadtong buwan sa Disyembre 2010. Wala niya damha nga sa ikatulo niyang kuha sa maong pasulit mahagbong gihapon siya. Milugmaw ang iyang luha sa wala hisabting pagbati.

Wala na ganahing mamahaw si Merlyn dihang iyang nakita nga nagkulismaot ang nawong sa iyang mama Linda. Iyang namatikdan nga misamot ang gibating kasina niini ngadto sa mga ginikanan kansang mga anak iyang ka-batch ug kabarkada pag-eskuyla sa nursing, nakapasar dayon ug nanarbaho na sa New Zealand.

Misulod si Merlyn sa iyang lawak nga naghilak. Gisiradohan ang pultahan ug giatubang ang imahen ni Jesus nga nagdupa sa krus. Nagkibotkibot ang baba:

“Jesus akong Dios; ang una, ika-duha ug ika-tulo nga pasulit nga akong giapilan wala ako’y napasahan. Wala ako magmakulang sa pagtuon. Gigahinan ko og daghang panahon aron makat-on. Bisan misalig ako sa akong kaugalingong katakos mata’g kuha ko sa maong pasulit, wala ko gayud kalimti; ang pagluhod gikan sa pultahan hangtud ngadto sa altar sa imahen sa Inahan sa Kanunay’ng Panabang sa Redemptorist Church, pagsayaw ug sinulog sa baba sa simbahan sa Senyor Santo Niño sa Sugbo ug pagtungas sa bukid sa Our Lady of Manaoag sa Sibonga. Gihangyo ko ang ilang makanunayong panabang nga unta makapasar ako sa pasulit aron ako makabaton og lisensya sa pagka nars. Apan niining ika-tulo kong pagkuha sa pasulit nga wala gihapon ko kapasar, gibati ko na ang kahiubos ug pagmahay nga wala mo patalinghugi ang akong pag-ampo. Hain na man diay ang imong giingon nga pangayo kay ikaw hatagan? Imo man lagi kong gipasagdan!”

Giuyog ang abaga ni Merlyn sa iyang bakho ug hingos sa kaguol. Nakahukom nga moundang lang una sa iyang pagpangalagad sa Parokya. Gibati siya og kaulaw nga nakig-atubang sa iyang mga kauban nga katekista ug magbabasa tungod sa iyang hitsura nga nanghubag ang mata.

Pipila ka adlaw nga milabay, samtang nagtan-aw si Merlyn sa telebisyon, migula ang balita nga may usa ka makusog nga linog ang nahitabo sa New Zealand. Migun-ob ug dagkong balay og daghan ang mga nangamatay. Uban sa nangamatay mao ang mga nars nga iyang ka-batch ug kabarkada.

Wala makalahutay si Merlyn nga nagtan-aw sa gipakitang hitabo. Gipangilogan siyang naghunahuna nga kun nakapasar pa siya pagka-nars, apil unta siya sa iyang barkadang nangamatay.

 Misulod siya sa iyang lawak ug giatubang ang imahen ni Jesus. Niining tungora dili na mga pagmahay ang iyang gilitok kun dili pagbasol ug pasalamat sa Dios: “Jesus, akong Ginoo; pasayloa ako sa akong kahuyang sa pagsalig sa imong pulong ug sa masalaypon kong pagtuo. Gibasolan ko ang akong pagmahay kanimo. Salamat nga gilikay mo sa katalagman ang akong kinabuhi sa imong paagi nga karon ko lang hisabti. Wala mo diay ako pasagdi. Dili gyud hilabwan ang imong paagi.” (Kataposan)