Kinamanghorang anak

Sa ganghaan pa lang sa St. James Funeral Homes ning dakbayan, gibabagan na si Rey sa sekyu. Gusto unta siyang mosud-ong sa patay’ng lawas sa giila niyang amahan.

“Sugo sa asawa’g mga anak sa namatay nga dili ka pasudlon!” Pintok nga pulong sa sekyu.

“Anak man sab ko’s namatay” ni Rey sa malumong pulong. Subo iyang nawong. Nikuot sa bulsa sa dughan sa iyang orange nga polo (isyu sa prisohan ang orange nga polo ug karsones). Nipagawas siya’g pinilong papel. Gihikyad niya atubangan sa sekyu iyang birth certificate. Gibasa sa sekyu ug nikunot iyang agtang ning sayong kahaponon. Nakapanglingi siya sa iyang luyo diin nakita niya ang asawa’g mga anak nga nanagbarog duol sa lungon. Isog ilang tinan-awan tumong sa pultahan. Nahatutok ang sekyu ni Rey ug sa escort niya nga correctional guard.

Gikotrahan si Rey sa iyang papa Ben sa buhi pa kini. Wa man gud siya magtinarong sa iyang pagtuon. Nakigbarkada siya’g mga dautan. Niapil siya’g fraternity ug bisyo sa gidiling drugas. Sa iyang kaisog, gihimo siyang hit man sa ilang gang nga gitawag og Red Talon. Kontra nila ang pundok nga gitawag og Black Claws. Tulo na iyang napatay. Unya sa ika-upat nga misyon niya, napakyas siya ug nadakpan. Nabalhog siya’s bilanggoan ug nakasohan.

Gisalikway siya sa iyang namat-ang pamilya. Ang sakit kay gisultihan siya’s tinuod. Dili siya tinuod anak ni papa Ben niya nga usa ka CPA. Midwife si Chona, asawa ni Ben. May maternity clinic sa ilang balay mismo sa baryo Karijona ning dakbayan. Si Rey anak sa usa ka pasyente ni Chona. Pinaangkan. Pagkahimugso niya, gibiyaan siya’s iyang inahan.

Naglibog ang managtiayon kun unsay buhaton sa puya. Kay himsog ang puya ug maayo’g hitsura, gikaluoy nila. Giparehistro nila nga ilang anak. Nilutaw nga kinamanghurang anak si Rey, sa upat ka mga anak. Lantip og pangutok si Rey. Valedictorian siya pagtapos sa elementarya. Sa hayiskul wa na siya kahuman. Kay nagsugod na iyang pagka-spoiled.

Tungod kay ambongan siyang pagkatawo, taas og barog, mestisohon, nahimo siyang mapahitas-on. Dili unta siya sultihan sa sekreto sa iyang pagkatawo. Apan napugos si Ben sa pagsulti dihang dili na mabangbang iyang pagkadautan.

Wa nagkulang og maymay ug tambag ang namat-an niyang ginikanan ug mga igsoon, aron magiyahan siya sa tanos nga dalan. Apan nilupa pag-ayo iyang atay nga makadungog sa siba sa iyang mga barkada nga siya ray brayit ug guwapo sa iyang pamilya. Nisamot iyang pagkadautan pagkasayod nga dili diay siya tinuod nga anak ni Ben ug Chona. Apan sulod sa hataas nga panahon sa iyang pag-inusara sa silda sa bilanggoan (tulo ka tuig na), naamgohan niya nga suwerte diay kaayo siya nga gisagop ug giilang anak sa usa ka ligdong nga pamilya. Nagbasol siya’s iyang kadautan. Gusto na siyang magbag-o. Mangayo siya’g ikaduhang higayon.

Grabe ang kaguol ni Rey pagkasayod sa kamatayon ni papa Ben niya. Komplikasyon sa diabetes ang namatyan sumala sa mga notisya gikan sa iyang mga higala. Puwerte niyang minatay sulod sa bilanggoan. Gikaluoy siya ni Danny, usa ka correctional guard nga nakasabot sa iyang kahimtang. Nananghid si Danny sa ilang warden nga siya ang mo-escort ni Rey aron lang makaduaw sa haya sa iyang amahan. Balig tulo ka oras ang gihatag sa warden nga pases. Kay nipasalig si Danny sa iyang responsibilidad.

“Ayaw gyud paghunahuna’g puga. Kay kun magduda lang ko bisa’g gamay nga mopuga ka, pusilon na tika’g deretso!” pahimangno ni Danny.

“Mama Chona, brod Delfin, brod Nilo, sister Edna. Pasud-onga lang kong papa Ben bisa’g usa lang ka minuto. Nagbasol na ko’s akong mga sala” pangaliyupo ni Rey. Nagpanglingo ang upat. Tig-a na ilang mga kasingkasing. Nawad-ag paglaum si Rey. Gitukmod niya ang guwardiya kay mubo ug gamay ra niya. Nahapla ang sekyu. Nibarog og dali. Nibunot sa iyang rebolber. Gitorsi ni Rey ang kamot sa sekyu nga naggunit sa rebolber. Nailog ni Rey ang pusil.

“Bang!” Wa na kadungog si Rey sa buto. Nahagba siya. Nadat-ugan niya ang sekyu. Naggunit pa siya sa rebolber nga wa kabuto. Namansahan og dugo ang letrang “P” sa iyang bukobuko. Nitubod na’g sugod ang dugo gikan sa buslot sa iyang bukobuko. Nakapanglingo na lang si Danny nga napugos sa iyang gibuhat. (Kataposan)