Gula 1
Nakabantay si Jeffrey nga ang usa ka babaye nga nagbitbit og folder nag-ukon-ukon pagsulod sa pultahan sa City Hall mao nga iya kining giduol ug gipahiyoman. Mibawos kini og pahiyom kang Jeffrey.
“Mahimong mangutana? Asa nako i-submit ang akong application para makatrabaho ko dinhi sa City Hall?” matud sa babaye nga seksi og panglawas ug maanyag. “Aw mangaplay ka’g trabaho? Tan-awon nato ang imong biodata.”
Gitunol dayon sa babaye ang gibitbit niya nga folder ngadto ni Jeffrey. Misalig kini kay nagsul-ob man si Jeffrey og ID nga nagmatuod nga kawani g’yud siya sa City Hall.
Nasiklapan ni Jeffrey ang usa ka bahin sa biodata sa babaye nga nagtug-an nga ang kasamtangan niini nga trabaho usa ka dancer. “Dancer ka diay? Kun mao gamit ka kaayo kay makatabang ka pagtudlo sa mga City Hall Sinulog, contingents,” ni Jeffrey pa.
Mipahiyom ang babaye. “Sige tabangi ko bi. Asa dapit ang opisina sa personnel department?” “Tua sa 8th floor, tana ubanan tika sa opisina ni Ma’am Jovy Morelos,” abtik nga tubag ni Jeffrey nga nakalimot na lang sa iya g’yud nga tuyo nga kuhaon ang iyang laptop sa sakyanan.
“Kimberly diay ang akong ngalan,” giingnan si Jeffrey sa babaye. “Ako sab si Jeffrey, staff ko sa mayor’s office.” Nahinangop kaayo si Kim pagkadungog kay nagtoo siya nga makatabang si Jeffrey kaniya nga madawat sa trabaho.
“Yuna pa, mas maayo tingali Kim nga iuna nato paghatag ang imong application letter ug biodata didto g’yud sa opisina sa mayor. Amigo nako si Nards Chiu nga consultant sa mayor. Magpatabang ta nga marekomendar ka niya,” giingnan ni Jeffrey si Kim.
Wala na sila mopadayon pagsakay sa elevator para sa opisina sa personnel department, didto na sila mideritso pagsulod sa opisina sa mayor.
“Pwede ba matabangan nimo ning akong amiga Bai nga makatrabaho dinhi sa City Hall. Makatabang ni siya pagtudlo sa mga dancer nato sa Sinulog,” giingnan ni Jeffrey si Nards. “Diin na man ‘sab nimo ni mapalgi?”
Gikipat-kipat ni Jeffrey ang iyang mata ngadto kang Nards nga nagpasabot nga dili siya bukhon. Naila na man gud si Jeffrey sa City Hall nga sagad kun may applicants iya dayon nga tabang-tabangan apan dunay pakapin.
“Balik lang unya mi Bai Nards, diha lang usa na nimo ang folder ni Kim,” giingnan ni Jeffrey si Nards nga igo lang nakapanglingo-lingo. (Sumpayan)