Gula 7
“Bitaw Beth, bahala na og wala ko makauban sa among drama didto sa Borbon basta kay ang importante nga dia ka sa akong kiliran,” matud ni Edwin.
Giparaygan na usab ni Edwin ang dalaga. Inanay na usab nga nakasugnib og kainit sa kalawasan ni Beth ang pagparayeg ug pagpagilok kaniya sa dramatorgo niya nga hinigugma. Takulahaw lang nga namingaw pag-usab ang lawak sa motel.
Sa ikaduhang higayon nakutlo na usab ni Edwin ang pagkabuwak ni Beth. Human sa ilang pagparayganay, takulahaw lang nga nakapangutana si Beth kang Edwin. “Dili ba duna ka na may uyab sa probinsya Edwin, imo na ba usab siya’ng naangkon?” matud ni Beth. “Wala , wala g’yud kay dili man gani hapit magpahawok,” matud ni Edwin.
Gabii na kaayo sa pagpanggawas nila sa motel sa downtown area. Mipara dayon og taksi si Edwin ug giuna sa paghatud si Beth sa ilang balay sa barangay Caretta ug dayon mipauli siya sa ilang balay. Sa kakapoy diretso si Edwin nga nakatulog. Tungod sa kanindot sa iyang paghinanok, alas nueve na sa buntag siya nga nahigmata.
Nagdali-dali si Edwin pagkaligo kay nahinumdom siya nga Lunes ra ba diay, daghan kaayo sila og recordings nga drama. Mikabat lang og 10 minutos ang iyang pagkaligo. Plano niya nga molakaw na lang siya nga dili usa mokaon. Samtang nagsul-ob sa karsones, gitan-aw niya ang iyang phone ug iyang nakita nga daghan diay nga mga message ang wala niya mabasa.
Mi-text diay kaniya si Beth mga ala-una sa kaadlawon kay wala kini makatulog nga naghuna-huna sa nahitabo kanila. Apan misamot napasiga ang mga mata ni Edwin kay daghang missed call ug wala mabasa nga text messages sa iyang cellphone nga gikan sa ilang drama supervisor. Midali siya pag-adto sa estasyon.
Nagsugod na ang recording. Mosulod na unta si Edwin sa drama room, apan sirado.Sanglit bildo man ang pultahan, nakita siya sa supervisor nga migawas sa iyang nahimutangan. “Ari sa office,” sa supervisor nga daw pintok ang sinultihan.
“Apektado ang atong drama sa Borbon gabii kay wala ka moadto. Karon, sayo kita nga nagsugod apan wala ka. Pangita na lang og laing trabaho Edwin,” pintok nga pagkasulti sa drama supervisor.
Miadto gilayon si Edwin kang Beth. “Gitaktak ko sa trabaho.” Wala dayon motingog si Beth. “Sagdi lang, makakita ka ra’g trabaho, engineer ka gud.”
“Dili ko tinuod nga engineer Beth, komedya ra kadto ni Kuya Edgar,” ni Edwin pa. “Mao ba? Kun mao kutob na lang usa karon ang atong relasyon,” dayong biya ni Beth kang Edwin. (Katapusan)