Maunongon Ang Gugma

Gula 51

Apan mipatigbabaw gayod ang dako niyang tinguha sa pagpanimalos kang Brandon Mercado. Maong nakaingon siya sa hilom nga bahala na ang Dios kun unsay iyang dangatan.

Pagkabuntag, wala si Jeffrey sa payag sa pagmata ni Danica. Wala na lang niya kini pangitaa. Misantop sa iyang hunahuna nga tingalig misayo kini’g taak sa bagang kakahoyan sa unahan aron pagpangayam og manok ihalas nga ilang ikasud-an.

Naghikay na lang si Danica alang sa ilang pamahaw. Buwahan inig-abot ni Jeffrey, andam na ang ilang pagkaon.

Wala madugay nahiabot siJeffrey. Pero wala diay kini mangayam. Misayo diay kini’g kaligo sa tubod.

“Wow,” ni Danica pa. “Presko...”

“Naligo ko aron dili na manimahong piotpiot,” ni Jeffrey.

Wala kalikayi ni Danica ang pagpasiplat kang Jeffrey. Nakabantay siya nga milutaw pag-ayo ang kaambongan sa ulitawo karon nga bag-o kining nakakaligo. Mora gyud og si Pierce Brosnan, ang paborito niyang action star sa Hollywood nga nakadala sa papel ni James Bond 007. -- Sumpayan pa