Gula 5
Nangabli na ang tindahan ni Iya Sidra sa iyang pag-agi. Diha nay sayong mipalit og kinahanglanon sa balay. Nanglingi sila pagkakita kaniya. Milugdat ang ilang mga mata, mora’g nakakita’g tambaluslos sa awaaw’ng sapa. Iyang namatikdan ang langyaw’ng diwa nga mihun-ag sa ilang tinan-awan. Unya naghunghongay ang duha ka babaye.
Mipadayon siya paglakaw. Sa paghisaylo niya sa tindahan, iyang nabatyagan nga migilok ang iyang tangkugo. May pagbati siya nga gisundan siya’g tan-aw sa duha ka babaye didto sa may tindahan. Sa sangi sa iyang handurawan nakita ang baki nga gitabangan og bato sa mga bata. Mipaturatoy siya sa paglakaw nga wala’y lingilingi.
Wala madugay, nahitukmaan niya ang tugkaran sa balay nga hinimo sa nipa, kahoy ug kawayan. Larawan sa kawad-on ang maong pinuy-anan. May pipila ka bahin niini nga nagsugod na’g kahunlak. Dihay tunokon nga mga kamot nga mikumot sa iyang balatian samtang nagsud-ong sa maong talan-awon. Ang gidangatan sa ilang pinuy-anan maoy linugdangan sa iyang pagbiya sa kiliran sa iyang mga mahal sa kinabuhi. Nakapanglingo siya. Dihay nagkadaiyang pagbati nga nagpingki sa iyang kahiladman.
Mihinay siya pagduol sa balay. Ang kakulba ug kahinam nagbugno sa iyang kahiladman samtang ang iyang mga lakang nagkaduol sa pultahan. Milahos siya pagsulod nga wala mangatahoran. Iyang natukmaan sa hawanan sa sala ang batang lalaki nga naghagpat sa mga dahon sa kamunggay. Nakugang kini sa iyang pagbutho. Misangpit ang bata sa inahan niini: “N-nay,” diay tawo nga misulod.
“Ayaw kahadlok, Dong,” gialam-alaman niya ang bata nga wala makaila kaniya sanglit masuso pa kini sa iyang pagbiya. “Dili ko daotang tawo.”
Wala motingog ang bata. Ang panan-aw niini wala ibulag kaniya. Wala kini mamilok, mora’g nalisang sa kalit niyang pagtungha. -- Sumpayan pa