Maunongon Ang Gugma

Gula 48

“Manghinaot lang kita. Kini lang ang nakita kong bugtong paagi aron makalingkawas ka sa imong problema bahin kang Randy Unson. Kun mamatud-ang dako gayod ang iyang involvement sa sindikato, seguradong maposasan siya ug wala ka nay problema kaniya. Mahimo ka na unyang mopauli sa inyo kun madakpan na si Randy.”

Wala motingog si Danica. Mora siya’g nabukog sa ulahing gisulti ni Jeffrey. Wala pa sa iyang plano nga mopauli ngadto sa balay sa iyang mga ginikanan sa Pardo. Sa pagkakaron, kontento siya sa iyang kinabuhi uban kang Jeffrey. Dili una siya gustong maghunahuna mahitungod sa umaabot. Ang panahon lang maoy iyang agdon.

“Nindot sab ning dapita, no,” ni Danica nga mipalain og hilisgotan, “kay bisan og bukid apan may singnal sa cellphone.”

“Mao bitaw,” ni Jeffret pa. “Daghan na man gud ang mga cellsite karon mao nga may signal na bisan sa kabukiran.”

“Usa sa naghatag nako’g suwerte kanang cellphone nimo.”

“Nga-ngano man?”

“Kun wa pa kana mahibilin dinhi sa payag kagahapon, hayan dili na gyud kita magkita kay mobiya ka na man diay unta dinhi.” -- Sumpayan pa