Balik sa gibiyaan nga kalibotan

Gula 4

Naigking siya dihang may nabati siyang kagahob nga daw naggikan sa kahanginan. Naaghat siya sa paghangad. Maoy misugat sa iyang panan-aw ang panon sa mga abukay nga nanglupad paingon sa bukid sa Kaandis. Nalingaw ug nahimuot siyang nagtan-aw sa mga langgam nga puti og mga balhibo. May mensahe nga kaluha sa iyang kinabuhi ang salida sa kabuntagon nga nakita.

Ingon niini ang talan-awon nga masaksihan sa ilang dapit matag panahon sa tingmais. Ang mga abukay giisip nga dangan sa mga mag-uuma. Kusog mokaon ang maong mga langgam sa puso sa mais. Apan nanginabuhi lamang sila sumala sa ilang masarang. Ang ilang kinabuhi nahatagan lamang og mabaw nga kahulogan sa tawo.

Nahitalunong siya. Dihay mitukbil sa iyang hunahuna. Mililas sa iyang handurawan ang pasundayag sa mga kabos nga gidaugdaog, gipanamastamasan ug gilupigan. Giisip silang mga dangan sa katilingban sa mga mapahitas-on ug tikasan. Giyatakan sa mga halangdon ang ubos nilang katungod. Dihay binuhat nahisama sa irong angkan nga ang mga itoy buot dagiton sa manunukob. Mibanghag kini aron pagpanalipod sa iyang katungod.

Takulahaw may midumbol sa iyang kahimungawong. Kalit milagsik ang iyang mga tiil. Misugwak ang kahinam sa iyang kaisipan. Misantop sa iyang hunahuna ang mga binuhat nga kanhi iyang gipanalipdan. Sila ang mga binuhat nga karon iyang gikamingawan. Giiliw sila sa iyang dughan.

Baskog ug tag-as ang bikang sa iyang mga tiil. Didto sa unahan nalantawan niya ang usa ka tindahan. Unahan sa maong tindahan mao na ang ilang pinuy-anan. Ang nagtaob nga kahinam misanap na sa lapyahan sa iyang kahiladman. Dihay mga pako nga mikapakapa sa iyang dughan, naghatag og kagaan sa iyang lawas paglagsik sa iyang mga lihok. -- Sumpayan pa