Mga kalag nga gisul-an sa tiyan

Atol sa kalag-kalag, sayo kaayong nangadto ang managhigalang si Jaymart ug Melvin sa sam-ang sa Tabogon. Nga anaa mahimutang sa Barangay Maslog. Ug duol ra kaayo sa poblacion.

Mao pa lang gani ang pagtikyop sa kangitngit, sa ilang paghiabot. Hinuon, ubay-ubay na usab ang mga tawo nga diha niadtong tungora. Kang kansang tuyo mao ang pagdagkot kon pagduaw sa ilang mga minahal sa kinabuhi, nga mitaliwan na sa laing kalibutan. Gani, ang uban kanila, nagdala og mga pagkaon ug hasta pa mga ilimnon. Ingon man usab mga preskong buwak. Ug gipangtungtong nila kini sa ibabaw sa panteyon. Nga maoy ilang silbing halad, alang sa mga nangamatay na.

Sa laing bahin, nangandam nang daan ang managhigala sa naandan na nilang pagabuhaton. Diha nay dala nilang mga plastic bag, nga maoy sudlan unya nila sa mga pagkaon, nga gihalad unta alang sa mga minatay. Mao man goy ilang bisyo ang pagpanguha og pagkaon, lakip na ang mga ilimnon diha sa ibabaw sa panteyon. Mga pagkaon ug ilimnon nga alang unta sa mga minatay. Nga gipanghalad sa ilang mga kabanayan. Nga kanunay’ng naghandom kanila.

Taudtaod gayud ang pagpinaabot nila ni Jaymart ug Melvin, nga mamiya na ang mga managhalad og mga pagkaon ug ilimnon diha sa matag lubong. Dili man sab god mahimo, nga panguhaon lang dayon nila ang mga gipanghalad, kun anaa pa ang mga tagtungod. Anha pa man nila kini kuhaa, kun wala na diha ang nanaghalad.

Sa dihang nanglakaw na gayud ang mga nanaghalad og mga pagkaon ug ilimnon, gidalidali dayon nila’g panguha ni Jaymart ug Melvin ang mga gipanghalad diha sa ibabaw sa mga panteyon. Gipanulod nila kini sa mga “plastic bag”, nga ila nang giandam. Ug gipangdala ngadto sa usa ka payag, nga maoy gihimong nilang “hideout”.

Nagpatuyang lang ang managhigala sa pagkaon sa mga pagkaong ilang dala. Gilamian man god silang nagkaon sa nagkalain-laing mga potahe, nga gipangdalit unta alang sa mga kalag. Sa mga minatay.

Human nila’g kaon, nanginom usab sila’g bino. Kay diha may bino nga ilang nadala. Imported pa ra ba ang maong bino. Ug mao pa gayud nila matilawi. Morag tanlas kaayo kini sa ilang panilaw.

Apan sa dihang mihigda na sila sa sawog, aron unta matulog. Mikalit lang og suol ang ilang mga tiyan. Maong naglumbaay sila’g panggawas sa payag ug misuot sa banwa. Ug mipasirit sa ilang hugaw. Ubay-ubay gayud ang mga hugaw nga nahaw-as gikan sa ilang ginhawaan. Apan, nagpabilin gihapon ang kasakit sa ilang mga tiyan. Gani, nagping-it na sila sa hilabihang kasakit. Nga morag dili na gayud nila maantos.

Giabot na hinuon og pagbasol ang duha ka managhigala. Kay kun dili palang tingali tungod sa ilang kahangol, ug kun gitinagidyot palang nilag kaon ang matag potahe nga ilang nakuha sa ibabaw sa mga panteyon, dili tingali unta sila sul-an sa tiyan. Nagbasol na hinuon sila nianang higayona. (Kataposan)