Gula 2
“Swerte ka kaayo Engr. Edwin nga nadawat isip drama talent. Nindot ka man ‘sab gud kaayo mo-acting.. mora ka na g’yud og professional na nga taga radyo,” daw sagol bulatik ni Beth kang Edwin.
“Dili lagi ko engineer. Pangandoy usab nako Beth nga gawas sa pagka drama talent, gusto usab nako nga mahimong radio reporter ug announcer sama ni Kuya Edgar,” matud ni Edwin.
Nanulod sila sa usa ka kan-anan sa Fuente Osmeña. Samtang nag-atubang sila si Beth ug Edwin, diha g’yud nasuta ni Edwin ang talagsaong katahum sa dalaga. “Dili diay kamo manuroy karon ug ang imong boyfriend Beth?” gipangutana ni Edwin ang dalaga.
“After nagkabuwag mi ug ang akong first boyfriend, wala na ko makigrelasyon pa og laing lalaki.. ikaw, may deyt ka sa imong girl friend karon?” bawos nga pangutana ni Beth.
Nakahukom si Edwin nga dili limdan si Beth nga duna na siya’y girlfriend apan tua sa probinsya -- sa Barili. “Wala siya dinhi sa dakbayan Beth. Tua ra siya sa among baryo sa Giloctog,” ni Edwin pa.
Nahilom silang duha. Gipunting ni Beth ang iyang panan-aw sa oval sa Fuente Osmeña diin nagkaanindot na sud-ongon tungod sa mga suga nga gipasiga na kay alas sayes na sa gabii.
“Nakasuroy ka na diha sa Fuente?” gisukna ni Beth si Edwin. Nakabantay si Edwin nga nangita’g higayon si Beth nga makigpanuroy kaniya sa Fuente Osmeña apan dili lang makadirekta pagsulti.
“Oo kaniadto Beth, apan daku nako nga kalipay kun ikaw ang akong ikauban sa pagpanuroy diha,” ni Edwin pa nga mitutok ni Beth. “Sigi.. tana Dwin.”
Dali ra nga nagkasuod si Edwin ug Beth. Nagtupad sila niadtong lingkoranan ilawom sa punoan sa kahoy. “Abi nimo Beth, giswerte g’yud ko karong adlawa kay nadawat pa ko sa pagka drama talent ug nagkaila pa g’yud ta,” pasumbingay ni Edwin.
“Kun wala pa ko’y girlfriend karon Beth, sigurado g’yud nga manguyab ko nimo. I admit nga pagkakita nako nimo ganina, nadani g’yud dayon ko sa imong beauty,” nagngisi si Edwin nga mitug-an kang Beth.
“Mao ba? Kay ngano man diay og may girlfriend ka, dili na diay mahimong manguyab?” nagpahiyom si Beth nga miatubang ni Edwin. “Kun mao, dili nimo igsapayan nga manguyab ko nimo bisan og may girlfriend na ko?”
Giagbay ni Edwin ang tuo niya nga kamot sa abaga ni Beth samtang nagsandig sila sa lingkoranan ilawom sa kahoy. Hinay nga gipislit-pislit ni Edwin ang aping ni Beth ug mainampingon kini nga gipasandig sa iyang dughan. (Sumpayan)