Maunongon ang gugma

“Unsa man kini,” ni Danica dayong dawat sa plastic bag nga gitunol sa ulitawo.

“Tan-awa lang gud.”

Gibuksan ni Danica ang plastic bag. Iyang nasuta nga mga sinina sa babaye ug ubang mga gamit ang sulod niini.

“Pasensiya ka na nga kana ray akong napalit para nimo,” ni Jeffrey nga nagpahiyom. “Ambot kun makagusto ka ba niana. Di ra ba kaayo ko maantigong mamili og biste sa babaye.”

“Okey lang,” ni Danica. “Ang importante nga dunay ikasul-ob.”

Wala na motingog si Jeffrey. Nakita ni Danica nga gipanghaw-as na niini gikan sa mga plastic bag ang mga pinalit niini nga mga delatang pagkaon, bugas, noodles, asukar, kape, mga sabon, lamparilya ug uban pa. “Daghan diay ka’g kuwarta kay daghan man kaayo kining imong mga pinalit?” Sukit ni Danica.

“Nag-withdraw ko’g dako-dako sa akong savings sa bangko sa dihang nakapuga ko,” tubag sa lalaki. “Gikinahanglan ko ang kuwarta aron dili ko magkalisod-lisod sa akong pagtago-tago.”

Nakatulog si Jeffrey human sa ilang paniudto. Gipasagdan lang kini ni Danica. Misantop sa iyang hunahuna nga gikapoy si Jeffrey nga gikang nangompra. -- Sumpayan pa

Ang sinugdanan anaa sa kataposan

Ni Rosalie Vallecera

Mikagiki pagkatawa si Colleen. Katawa nga paraygon. Unya mi-awop ang iyang katawa dihang midapat ang mga ngabil ni Cody sa iyang ngabil. Dugay’ng nag-ukang ang ilang hinagkanay.

Usa ka adlaw niana, nagkasabot sila si Cody ug Colleen nga mangaligo og dagat. Sa usa ka beach resort sa habagatang Sugbo. Sila rang duha wala sila magdala og daghang kauban kay gusto nilang wala’y makadisturbo kanila.

Kay adlaw man kadto nga Domingo daghang tawo sa beach resort nga ilang gikaligoan. Nagpalayo sila sa ubang mangaligoay, matag karon ug unya maghaguraay sila samtang nangaligo. Dihang natagbaw na sila’g kaligo mikawas sila sa dagat ug miadto sa ilang cottage.

“Nasayod ka ba, Cody?” Gikan ni Colleen.

“Sa unsa, Colleen?” Misumbalik pagpangutana si Cody.

“Bahin sa akong feelings nimo.”

“Ngano man diay?”

“Ang tinuod dugay ra kong may pagbati nimo. Uyab pa mo ni ate Alexa niadtong panahona. Gitago lang nako ang maong pagbati aron dili ko makaguba sa inyong relasyon.”

“M-mao ba?”

“Mao kana ang matuod. Ug wa ko magdahom nga ang kataposan sa relasyon ninyo ni Ate mao diay usab ang sinugdanan sa katumanan sa akong mga pangandoy alang natong duha.”

“Ikaw gyud tingali ang gitagana sa Dios alang nako, Colleen, ug dili ang imong maguwang.”

Unya nagkatinutokay sila samtang gipisilpisil ni Cody ang tuong kamot ni Colleen. -- Kataposan