Lover Boy

Gula 4

Misulod si Orchids sa shower room aron maligo samtang si Boy diha ra maglingkud duol sa pultahan.

Taud-taud, nadungog ni Boy nga nagbusagak na ang tubig didto sa sulod nga nagpasabot nga naligo na si Orchids.

“Ahhhh, ahhhhh,” kusog kaayong singgit ni Orchids nga nadungog ni Boy dayon mibukas ang pultahan sa shower room ug migawas ang dalaga nga wala nay sapot.

Nagsunod nga migawas gikan sa shower room ang usa ka dakung ilaga. Nakahilak sa kakuyaw si Orchids. Nagpanilap si Boy nga nagtan-aw sa walay sapot nga lawas ni Orchids.

“Sige na balik na didto’g kaligo. Nagpagana-gana ka lang nako da,” sagol komedya ni Boy kang Orchids. “Tan-awa usa didto Boy basin og naa pay laing ilaga,” nagkurog ang tingog ni Orchids.

Natintal g’yud si Boy sa talan-awon nga iyang nakita. Gigakus niya si Orchids nga walay sapot ug giukoban ang mga ngabil. “Gusto ka ba nga magdungan ta’g kaligo para may kauban ka?” giingnan ni Boy ang dalaga.

Abtik kaayo nga naghukas si Boy sa iyang sapot ug nanulod sila si Orchids sa shower room. Mihari dayon ang kahilom didto sa sulod ug ang busagak ra sa tubig ang madungog.

Taud-taud, migawas silang duha gikan sa shower room. Giagbayan ni Boy si Orchids samtang nagtoghoy pag-ayo si Junior.

Didto sa kwarto gipadayon nila ni Boy ug Orchids ang pagparayganay. Taud-taud g’yud nga mihari ang kamingaw sulod sa lawak.

“Kadali ra sa panghitabo uy. Kaganina imo pa ko nga giimbestigar, karon imo na kong,” wala tiwasa ni Orchids ang iyang buot isulti ug hinoon iyang giukoban ang mga ngabil sa batan-ong polis.

“Nganong gihinganlan ka man og lover boy sa inyong hepe? Daghan ka diay kaayo og mga girlfriend?” gisukna ni Orchids si Boy. Mikatawa ang polis ug prangka nga misulti.

“Ingon ana g’yud ang mga lalaki, kun makalugar motira g’yud. Unsaon man gud, daghang mga babaye nga madakpan namo sa saturation drive diha sa Junquera ug sa Juana Osmeña mao may manghagad,” matud ni Boy.

Gibali ni Boy ang sitwasyon. Siya na usab ang misukit-sukit ni Orchids. “Ikaw, nganong dali ka ra man usab mopatol og lalaki? Tiaw mo, uyab pa mo si Ronnie ug gipatolan nimo ang imong detective.”

“Ambot, makapa-adik man gud kining romansa kun makasuway ka na,” nagpahiyom si Orchids nga mipasabot. Dayon nahilom na usab ang lawak ug ang mihari mao ang panagsang agumod ni Orchids. (Sumpayan)