Way sukod ang bawos

“Pagbuot gayud sa kapalaran...Miyoy, nga kitang duha magkadayon,” dihay ganay sa tingog ni Nisya nga hupong sa kaparaygon.

“Salamat Nisya, nga sa upat ka tuig nakong pagpangindahay sa tim-os kong gugma...nahumok gihapon ang imong kasingkasing aron imo akong higugmaon,” nagkayuring ang sinultihan ni Miyoy.

“Mao nga karong umaabot nga adlaw’ng Sabado...kita magpakasal sa simbahan sa lungsod sa San Fernando,” ni Nisya pa nga gipakitan og hagkot nga halok ang iyang hinigugma.

Kinsa man sad gud magdahom nga sa gidugayon nga pagpanindahay ni Miyoy sa iyang kadalisay sa paghalad ni Nisya...dunggon gihapon sa kataposan.

Nabaniog dayon sa kinatibuk-ang silingan ni Miyoy nga silang duha si Nisya...kaslonon ning ilang dapit sa balangay sa Kabatbatan.

Naahat gud si Miyoy, pagdespatsar sa bugtong niyang kabaw nga igdadaro, aron lang gayod maoy gastohon sa umaabot nilang kasal ni Nisya.

“Belib gayod ko nimo Miyoy...nga sa kadugayan nimong pagpangulitawo ni Nisya...imo gihapon siya nga naangkon!” ni Siyoy pa nga ingon sa mapaubsanon nga namulong.

“Gisuwertihan lang ako Siyoy, sa kahitas-an nga ako ang makaangkon sa gugma ni Nisya,” mapaubsanon nga mitubag si Miyoy.

Udtong tutok sa adlaw’ng Sabado. Gipaningot og bugbog si Miyoy nga nagpaabot kang Nisya sulod sa may simbahan. Gani si Padre Virgilio Abay, ang mao gayod ang mangunay nga mopahigayon sa misa sa kasal ni Miyoy ug Nisya.

Gipangulbaan na si Miyoy, kun unsa kaha ang nahitabo kang Nisya nga bisan anino wa man gayoy nakita hangtud miabot ang kahaponon.

Kahilakon na si Miyoy, nga naghunahuna. Way kabutangan sa iyang kabalaka ug kakulba. Sa iyang hunahuna...wa ba kaha intawon maaksidente si Nisya sa iyang gisakyan sa may matitip nga dalan sa bukiran sa Kabatbatan?

Hangtud mao na lang ang nabalitaan ni Miyoy, nga gitaban diay ni Siyoy si Nisya...ug didto dad-a sa may bukiran sa kampawog.

Upat ka tuig ang milabay. Di matukib sa pulong ang kaguol ni Miyoy nga nahinayak siya og baligya sa iyang kabaw nga igdadaro.

Makadaghan siya mosuway sa paghikog...puslan man nga wa niya maangkon si Nisya. Apan sa kadugayan nahupay ra kini.

Hapon kadto diin nag-inusara na lang si Miyoy og lingkod sa may punoan sa mansinitas. May dagtom sa usa ka babaye nga iyang nasigpatan ug kadugayan iyang namay-ongan nga si Nisya diay nga mikalit og gakos kaniya. Hugot kaayo, diin nagkanayon:

“Pasayloa intawon ako Miyoy...nga nakigtaban ako ni Siyoy, nga usa diay ka minyo...ug karon iya akong gibiyaan.”

Igo lamang gitubag ni Miyoy si Nisya...diin siya nagkanayon: “Gaba na kana nimo Nisya...ug way sukod sa bawos!” (Kataposan)