“Tingali gituyo sa kahigayonan nga magkaila ta.”
“Nganong nakasulti ka man niana?”
“Tungod kay pareho man kitang may masakit nga kasinatian sa gugma. Gilugos ug gipatay ang imong girlfriend. Gi-salvage sab ang akong boyfriend.” Wala motingog si Jeffrey.
“Gimahal mo ba gayod si Gemma?” Sukit ni Danica.
“Nganong nakapangutana ka niana?” Misumbalik pagpangutana si Jeffrey. “Gusto lang kong masayod. Pero...okey ra man sab kun dili nimo tubagon ang akong pangutana.”
“Okey lang. Tubagon nako ang imong pangutana...”
Miginhawa una’g lawom si Jeffrey.
“Gimahal nako si Gemma sa tibuok kong kinabuhi,” nagkanayon si Jeffrey. “Siya ang hinungdan kun nganong mipuga ko gikan sa bilanggoan tungod kay gusto kong mahatagan og hustisya ang iyang kamatayon.”
“Suwerte diay gihapon si Gemma bisan kun patay na siya,” nakaingon si Danica.
“Nganong nakasulti ka’g ingon niana?”
“Tungod kay nakabaton siya’g hinigugma nga sama kanimo nga andam magsakripisyo. Palaran ang mga babaye nga makabaton og hinigugma nga andam manalipod sa binuhat nga ilang gimahal.” -- Sumpayan pa