Maunongon Ang Gugma

Gula 38

“Moadto unta ko sa Negros, sa Sibulan. May uyoan man ko didto.”

“Unsa kaha kun mohinayon ta’g adto didto? Tingali’g mas safe kita didto?”

“Wa na koy plano nga molahos didto. Nagtuo kong mas peligro kun motabok ko sa Negros. Tingali’g ila nang gibantayan ang tanang posibleng lutsanan sa Negros gikan sa Cebu aron ila gyud kong madakpan.”

Human sa panihapon, diha sila si Danica ug Jeffrey sa tugkaran sa payag. Hingpit na ang pagtikyop sa kangitngit apan hayag ang palibot gumikan sa dan-ag sa takdol nga buwan. Nagdaob si Jeffrey aron moislag ang mga lamok.

Namatikdan ni Danica nga naghinuktok si Jeffrey samtang naglingkod sa miigdal nga dakong bato sa tugkaran sa payag. Ang mga mata niini gipunting ngadto sa daob.

“Mora’g lawom man ang imong gihunahuna?” Sukna ni Danica.

Panghupaw ray gitubag ni Jeffrey.

“May nakasamok ba sa imong hunahuna, Jeff?”

Miusab pagpangutana si Danica.

“W-wa man,” ni Jeffrey pa. “Nahinumdom lang ko kang...kang Gemma.”

“Ang imong hinigugma?”

“Oo. Hangtod karon dili pa ko makalimot sa nahitabo kaniya.” -- Sumpayan pa