Ang sinugdanan anaa sa kataposan

Gula 92

Pero wala na usab mopakita si Brendan kaniya. Sa iyang nahinumdoman, kapin na sa duha ka semana nga wala mamisita ang ulitawo kaniya. Mo-reply man hinuon kini kun iyang i-text. Pero out-of-town kuno kini. Maong wala pa gayod niya ikapadayag ang iyang plano ngadto kang Brendan. Dili mahimong sa text lang sila magsabot niining usa ka dakong desisyon nga ilang pagahimuon.

Sa pagsaulog ni Colleen sa iyang 20th birthday, nagpakita na gayod si Brendan kaniya. May gamay nga hikay ang iyang mga ginikanan nga gipahinungod sa sumad sa adlaw niyang natawhan. Dili daghan ang ilang mga bisita.

Ang mga bisita ni Colleen pulos nagdala og mga regalo alang kaniya. Apan si Brendan wala’y gibitbit nga regalo. Naghayon lang kining nahiabot sa ilang pinuy-anan. Apan wala kini hatagi’g gibug-aton ni Colleen. Ang presensiya ni Brendan maoy importante alang kaniya.

“Sorry, ha,” ni Brendan pa dihang nakahigayon sila’g panagsulti nga layo sa ubang mga tawo,” nga wa ko’y dalang gift alang nimo.”

“Okey lang, uy,” matud ni Colleen. “Ang importante mao nga wa ka gyud malimot niining adlawa.”

“Dili mahitabong malimot ko niining adlawa, Colleen, tungod kay kun wa pa kini, dili ko unta ikaw ikahimamat.”

Wala motubay si Colleen sa gisulti ni Brendan. Iyang gihunahuna kun unsaon niya pagsulti ngadto sa ulitawo ang gilaraw niyang plano -- nga magpa-SM sila. -- Sumpayan pa