Lingaw-Lingaw Lang

Gula 5

Gipahibalo ni Ralph si Orchids nga dunay usa ka customer nila sa bar nga gusto unta nga makigtibol kaniya. “Unya, unsay imong gitubag?” gisukna ni Orchids ang iyang bodyguard.

“Akong giingnan nga dili ka makigtibol ug akong gitug-anan nga ikaw ang tag-iya sa bar. Katunto nako no nga mosugot nga itibol ka’g laing lalaki, ako na lang,” matud ni Ralph.

Gitutokan ni Orchids si Ralph. “Tana uy, dad-a nang ubang dad-onon,” giingnan ni Orchids ang iyang bodyguard sa dayon niyang lakaw paingon sa gawas sa bar. Human kasirad-i sa gwardya ang pultahan sa bar, nanakay dayon sa kotse sila si Ralph ug Orchids.

Mitingog sa cellphone ni Orchids. Si Ronald ang nanawag. “Wala ka pa diay matulog? Paingon na ko pauli.. Oo di a kauban nako si Ralph. Bitaw duna kuno’y buot makigtibol nako ganina pero gibalibaran ni Ralph. Okay, good morning, love you,” ni Orchids pa ngadto sa iyang priso nga boyfriend.

Nakabantay si Orchids nga wala magtingog si Ralph, didto kini nagtutok sa gawas sa karsada nga ilang giagian. “Oo,nganong wala ka na man magtingog diha? Mikalit ka man lang og kamingaw?” gisukna ni Orchids si Ralph.

Nangagho si Ralph ug subo ang panagway. “Nagselos ko kaninyo ni Ronald nga nagsultihanay. May pakapin pa nga love you,” mubo nga tubag ni Ralph. Nahakatawa si Orchids apan wala siya motubag. Gihuna-huna niya ang pagpangulitawo kaniya ni Ralph.

Taud-taud, miabot na sila sa balay. Human ika-parking ni Orchids ang sakyanan, giawhag niya si Ralph nga dad-on ang ubang butang. “Ayaw usa pagpauli. Dad-a diri sa akong kuwarto ang akong mga butang,” dayong sulod ni Orchids sa balay.

Tua ra magkatulganan si Ralph sa kuwarto nga nahimutang kilid sa kusina, apan gawas sa balay ang pultahan.

“Asa ni ibutang Gelyn,” matud ni Ralph paghitangka niya sa pultahan nga nagpabiling bukas. “Dali isulod diri og ibutang sa lamesa.”

“Hamugaway man diay kaayo ning imong kwarto Gelyn. Sige moadto na ko sa akong kwarto,” mipaingon dayon si Ralph sa pultahan. Apan may gisulti pa si Orchids kaniya. Mihunong si Ralph ug nakita niya nga gihukas ni Orchids ang iyang gisul-ob nga T-shirt. Milurat ang mga mata ni Ralph kay wala lang magtapis si Orchids dihang gihukas niini ang iyang bra.(Sumpayan)