Walay gikasumpay si Danica sa gisulti ni Jeffrey. Nakasabot siya nga ingon sa walay ideya ang dalaga mahitungod sa bulohaton sa usa ka polis.
“Nindot kining maong mga ebidensiya,” ni Jeffrey pa. “In fact, dako kini’g ikatabang sa mga imbestigador aron makakuha sila’g lead ug makabaton og ideya kun asa nila sugdi ang imbestigasyon. Dili pa hinuon makapabarog sa kaso kining maong mga ebidensiya atubangan sa korte. Apan kun mahimoan kini’g imbestigasyon, mosangko gayod kini sa kasulbaran.”
“Anugon kaayo, Jeffrey,” ni Danica pa.
“A-ang unsa?” Mikunot ang agtang ni Jeffrey nga wala makaagpas sa gisulti sa dalaga.
“Nga nagkaila kita nga wala ka na sa serbisyo,” ni Danica. “Kun nakaila pa lang ko nimo kaniadto, tingalig ikaw maoy gitugyanan ko nianang maong mga ebidensiya.”
“Dili pa ulahi ang tanan, Danica.”
“Unsay buot mong ipasabot?
“May mahimo pa ako aron mapuslan kining maong mga ebidensiya.”
Nakahunahuna si Jeffrey ni Col. Vince Noot, ang iyang labaw nga opisyal sa nag-alagad pa siya sa CPPO. Adto niya ipadala kang Col. Noot ang tanang mga hunch and circumstantial evidences nga nahuptan ni Danica batok ni Randy Unson ug sa Bangkulis Gang. -- Sumpayan pa