Gula 33
“Si Efren ang naghatag kanako niana,” mubong tubag ni Danica.
“K-kinsang Efren?”
“Si Efren Galas, akong hinigugma. Usa siya sa mga sakop ni Randy. Pagkasayod nako nga miapil si Efren sa illegal nga kalihokan, gihangyo ko siya nga mobiya sa grupo nila ni Randy. Apan wala mosugot si Randy nga mogawas siya sa Bangkulis Gang.”
“Hain na man karon ang imong hinigugma?”
“Gipatay siya, Jeffrey. Nagtuo ko nga may kalabotan gayod si Randy sa iyang kamatayon. Apan sa wala pa patya si Efren, gikahatag na niya kanako kanang maong mga ebidensiya. Ako na kuno’y bahalang mangita’g paagi nga mahidangat kanang maong mga butang sa mga kamot sa tarong nga mga polis.”
“Mao diay nga dili ka gayod makadawat kang Randy Unson nga maoy imong mabana tungod kay gawas nga nasayod ka sa pagkalambigit niya sa illegal nga kalihokan, siya man usab ang imong gidudahan nga may kalabotan sa kamatayon sa imong hinigugma.”
Wala motingog si Danica.
“Dili basta-basta kining mga ebidensiya nga imong nakuha, Danica,” matud ni Jeffrey. “Involved niini ang daghang prominenteng mga personahe sa Cebu. Ang tinuod, naghimo na ko’g imbestigasyon niini kaniadto sa dihang mihatag nako’g info ang higala nakong investigative reporter. Pero wala matiwas ang gihimo kong imbestigasyon tungod kay natangtang man ko sa trabaho human mapasanginling naglugos ug nagpatay sa kaugalingon kong hinigugma.” -- Sumpayan pa