Giablihan ni Danica ang shoulder bag niini ug gikuha ang usa ka taas nga sobre. Gipagawas usab ni Danica gikan sa bag ang usa ka video tape ug journal. Gitunol niini ang tanan ngadto kang Jeffrey. “Unsa man kini?” Nakasukna si Jeffrey samtang nagkagukang ang iyang mga kamot sa mga butang nga gihatag ni Danica kaniya.
“Mao kana ang akong giingon nimo nga hunch and circumstantial evidences,” matud ni Danica. “Kanang sobre, mga papeles ang sulod niana nga gilangkoban sa mga bank accounts abroad ug acknowledgement receipt sa mga bank draft ug bank transfer. Kanang video tape, nakita niana ang hapit tanang mga sakop sa sindikato. Ug kanang journal, nahisulat diha kun unsa kalawom ang involvement ni Randy Unson sa Bangkulis Gang.”
Gipagawas ni Jeffrey gikan sa sobre ang mga papeles ug gitagsatagsa pagsuhid. Unya maoy sunod niining gipaklipakli ang mga panid sa journal.
Nakugang si Jeffrey sa iyang nabasahan sa maong journal. Nahisulat didto ang kalambigitan ni Randy Unson sa sindikatong Bangkulis Gang uban ang pipila ka taas nga opisyal sa gobiyerno ug militar. Ang uban gani kanila nailhan mismo ni Jeffrey. Iya na kining gisugdan pag-surveillance kaniadto sa nag-alagad pa siya sa Cebu Provincial Police Office.
“Sensitibo kining mga kasayoran nga imong nahipos Danica,” nagkanayon si Jeffrey. “Giunsa mo man pagkuha niining maong mga ebidensiya?” -- Sumpayan pa