Ang bati og nawong

“Dinhi man to gikan sa inyo ang bati og nawong, Imelda,” matud ni Mila, “unsa may tuyo ato?”

“Sige’g pangulitawo bisan ako nang giprangkahan nga wa siya’y mapaabot. Ikaw, nangulitawo man sab na nimo, basin imong kursonada?”

“Kun si Urbano lang nga bati kaayo’g nawong, wa pay kangho, gamson ko na lang ning ako, Imelda.”

“Ambot lang anang Urbano, kadako na ana’g edad, nangulitawo pa gud kuno nang mama sa dalaga pa siya.”

“Nalukop man lang na’g pangulitawo apan wa man gyu’y misugot.”

“Kinsa man say ganahan nga mosugot niana ngil-ad kaayo’g nawong. Naa pay ilong nga patuyang lang og katay mora’g agbati.”

Ingon niana ka tinamay si Urbano apan bisan manananggot lang kini, kugihan kaayo ug matinabangon sa iyang isig-katawo.

Usa ka buntag, samtang nanilhig si Imelda sa ilang nataran, may mihunong sa iyang tungod nga bag-o kaayong Mercedes Benz.

“Miss, hain man ning balay ni Urbano San Esteban?”

“Kanang payag, ay,” mitudlo si Imelda. “Ngano man diay?”

“Iya man ning awto. Gipadala sa iyang maguwang una mamatay ug duna pa siya’y $20 million sa bank of America.”

“Kinsa ka man diay, Sir?”

“Ako ang abogado sa iyang igsoon sa Hawaii,” dayong sakay sa tawo paingon sa payag ni Urbano.

Wa pa gani maudtohi, mikaylap na ang balita sa tibuok lungsod sa Mangiao nga milyonaryo na si Urbano. Nianang pagkahapon, sakay si Urbano sa bag-ong Mercedes paingon sa siyudad kauban ang abogado.

Duha ka semanang nawala si Urbano ug sa pagbalik niini, nakaterno na sakay sa Mercedes nga may kaugalingong drayber ug guwapa nga sekretarya sa iyang tupad.

Misugat kaniya hapit tibuok lungsod ug nagpahikay dayon siya didto sa balay sa pinakadako sa ilang lungsod diin adto abot si Urbano samtang nagpahimo pa siya sa iyang mansiyon. Si Imelda hapit di lang mobulag sa tupad ni Urbano ug nakig-away kini sa dihang gibadlong sa sekretarya.

Kada adlaw, tua lang ang mga nawong sa mga dalaga lakip na si Imelda ug si Mila nga makighinabi kang Urbano nga kaniadto ilang gi-ayran ug gisalikway kay bati og nawong ug wa pay kangho. Apan wala na patental si Urbano kanila, ug pagkahuman sa mansiyon ni Urbano, gipahibalo dayon ug gidapit ang tanan sa kasal sa lalaki ug sa iyang sekretarya.

Hilabihan ang hilak ni Imelda sa kasal sa lalaking kanhi iyang gitamay ug wala gani kini motambong sa hikay. (Kataposan)