Barikos

Dear Tita Salie,

Maayong adlaw kanimo, Tita. Tawga lang ko sa pangalan nga Ruth. Usa ka minyo ug dunay upat ka mga anak. 15 years old na ang akong kinamanghoran ug ako 47 na ang edad.

Mapasalamaton ko sa Ginoo kay malipayon kanunay ang among pagpuyo uban sa among mga anak. Nagdako sila nga dunay kahadlok sa Dios ug wala gayod sila magpabadlong kanamong ilang ginikanan. Buotan usab ang akong bana. Hinuon dunay mga problema ginagmay apan masulbad ra gihapon namo basta anaa ang pagsinabtanay ug pagtinabangay.

Ang akong suliran, Tita, wala’y labot ang akong pamilya. Ako lamang kining problema. Mahitungod kini sa akong barikos nga mikatay na gikan sa akong tiil ug miabot na hangtod sa akong paa.

Nagproblema gayod ko niini, Tita, kay dili man ko ka sul-ob og bisan unsa sama sa shorts, pedal ug sayal. Kanunay na lang ko nga magpantalon kay mauwaw man ko. Asa man ko moduol og doktor nga mahal man ug asa man ako magpa-doktor nga dili mahal aron akong ipatan-aw ang akong barikos, Tita? Kay basin dili ko ka-afford sa bayranan. Gusto ko kanang barato lang unta. Palihog Pasabta ko. Daghang salamat. -- Ruth

* * *

Maayong adlaw usab kanimo, Ruth. Malipayon ako nga nagbasa sa imong tampo. Tungod kay dako ang atong problema karon sa pamilya. Daghang pamilya nga nagkabuwag o nangabungkag. Mao kini ang dakong hagit sa atong society ang issue sa pamilya. Apan matud mo ang imong pamilya dili apektado sa maong problema.

Kabahin sa imong giantos nga barikos, mas maayo seguro kun magpatan-aw ka og eksperto nga doktor. Sila ang gisaligan mahitungod sa atong problema sa lawas. Busa aron segurado ta ug dili na mahasol pa kinahanglan gayod nga magpakonsulta ka og eksperto.

Aron dili ka madak-an sa gasto, kun taga Cebu City ka moadto ka sa CCMC o Cebu City Medical Center. Pangitaa didto ang doktor nga maoy gisaligan sa pareho nimo og suliran. Apan kun ikaw taga probinsiya sa Sugbo moadto ka lang sa Vicente Sotto Hospital. Kinahanglan ka mosayo og adto kay mokuha pa man ka og priority number . Unya daghan kaayo og tawo, busa mas maayo kun sayo. Since government kini nga mga hospitals so, minos ang imong gasto.-- Tita Salie