Gula 84
Ang iyang Ate Alexa giisip niyang usa ka biktima sa usa ka lalaking bakakon ug wala’y baroganan.
“Dili man sab tanang lalaki sama kamapahimuslanon ni Jack,” nagkanayon si Brendan usa niana ka higayon nga namisita kini kang Colleen. “Kun dunay mga lalaking bakakon, duna usay tarong ug matinud-anon.”
“Ug usa ka na kanila?” Sagol komedya ang sukna ni Colleen.
“Dili kay ako lang,” ni Brendan pa. “Duna pay daghang lalaki nga kasaligan. Ang lalaki nga matuod nga nahigugma sa usa ka babaye magbaton gayod og respeto ngadto niini. Ang uban gani andam nga mohatag sa babaye nga ilang gihigugma ngadto sa lain kun maoy makapalipay niini.”
Nahinuklog si Colleen sa gisulti ni Brendan.
“Wa na dinhi si Ate Alexa,” giingnan ni Colleen si Yana usa niana ka adlaw nga nahitukboy kini sa ilang pinuy-anan. “Tua siya sa Davao.”
“U-unsa?” Nakugang si Yana. “Nag-unsa man siya didto?”
Gisuginlan ni Colleen si Yana sa nahitabo, sukad sa pagkabugto sa relasyon nila ni Alexa ug Cody hangtod na sa pagkadisgrasya sa iyang maguwang sa mga kamot ni Jack.
“Oh, my goodness,” nakatuaw si Yana. “Mao diay nga dili na siya mo-reply sa akong mga text niya. I’ve been missing a lot.” -- Sumpayan pa