Challenge

Sir, puede ikaw akong abogado? Kay ikiha nako si Atty. Julian Borden, mayor sa among lungsod sa Hazaras!” ni Dante ngadto’s iyang amo nga si Atty. Albert Palmero. Gituyo gyud niya’g duol iyang amo sa oras nga wa nay kliyente ug hapit na mobiya sa bupete.

Gipasiklapan ni Dante ang wall clock sulod sa opisina. Minus kinse para alas singko sa hapon. Nitindog na si Atty. Palmero nga nagbitbit sa iyang porpolyo pagduol ni Dante nga may lamesa atbang sa lamesa sa abogado. “Ngano man diay? Unsa may sala sa inyong mayor?” sa abogado. “Tan-awa ra god ni, sir?” ni Dante nga nagtunol og mga papel sa abogado. Gidawat sa abogado. Unya nilingkod siya’g balik aron sa pagbasa sa mga papel. Gipatong niya’s lamesa iyang porpolyo.

Legal researcher si Dante ni Atty. Palmero nga nag-opisina luyo sa City Hall ning dakbayan. Nagsugod lang siya’g serbisyo isip diyanitor sa maong bupete. Apan kay kugihan moeskuyla magabii, unya studious kaayo, naanam siya’g ka-promote. Gikan sa diyanitor, nahimong messenger. Gikan sa pagka-messenger, nahimong clerk/typist. Hangtud dangtag lima ka tuig serbisyo nga nakagradwar siya’g Accountancy, nahimo siyang legal researcher kay nipadayon og tungha’g abogasya.Onse ka tuig na siya’ng serbisyo sa abogado, ug bag-o lang siyang nikuha’g bar exams. Apan nahagbong siya. Pero wa niya igsapayan, kay niya pa, mokuha siya’g katulo sa bar exams. Kun di gyud siya kapasar human sa ikatulo, kalimtan na niya iyang ambisyon nga mag-abogado.

Nakontrahan siya sa mayor sa ilang lungsod. Kay kusog siyang mosaway sa mayor. Unya daghang eyes and ears ang mayor sa mga eskina-eskina nga pundokanan sa mga tawo. Hilig mag videoke si Dante. Unya adto’s videokehan libakon niya ang mayor.

“To Dante Eleusis: Condolence for not passing! From: Bert Juarez” mao ni ang nabasa ni Atty. Palmero sa kinaibabwa’ng papel gikan ni Dante. Sinulat og kamot nga minulde ang maong mensahe. Nadawat ni Dante anang pagkasunod adlaw human niguwa sa mantalaan ang resulta sa bar exams. “Uy! Unsa god ni! Grabeng insulto ug bugalbugal batok nimo! Kinsa man ni si Bert Juarez?” sa abogado. “Alyas lang na sa mayor. Naa koy ebidensiya nga gikan ni niyang sulata!” ni Dante nga malagoton. “Paklia lang ang sunod panid” ni Dante. Nabasa ni Atty. Palmero ang tulo ka dahon sa desk pad ni Mayor Borden nga may mga agi niya. Tataw gyud kaayo nga ang mayor gyud ang nagsulat sa mensaheng insulto. “Nganong nakakuha ka mag desk pad sa mayor?” sa abogado. “Uyab man nako ang sekretarya sa mayor” ni Dante nga nakapahiyom. “Belyako gyud ka da. Unya, unsa may kaso atong ipasaka batok sa mayor?” sa abogado. “Unjust vexation with damages” ni Dante. “Sakto, abogadohon na gyud ka. Suheto ka nas balaod. Apan hunahunaa pag-ayo kun desidedo ba gyud ka. Biyernes man ron. Hinoktoki pag-ayo sa Sabado’g Domingo kun mao ba gyuy imong gustong buhaton,” sa abogado. Nitindog ug nibiya sa bupete.

Pagka-Lunes sa buntag, mapahiyomon na si Dante. “Unsa na man? Nawala na imong kalagot sa inyong mayor?” ni Atty. Palmero pagsulod sa bupete nga nakitang nagpahiyom na iyang empleyado. “Di man diay to kamaong mangulitawo among mayor. Gitakdang kaslon siya gahapon. Ang iyang pangasaw-onon, giduso lang sa inahan sa babaye kay maoy nakauyon niya nga abogado pa, mayor pa. Kasal unta nila gahapon, apan wa siya tungaha sa pangasaw-onon” ni Dante nga nagkatawa. “Unya unsa may imong gibuhat?” sa abogado nga nagduda nga may gibuhat gyud iyang tawo. “Gipadad-an sab nako’g mensahe nga nag-ingon “CONDOLENCE FOR NOT WEDDING” ni Dante. “ha! Ha! Ha! Ha!” pwerteng bahakhak sa abogado. “Unya modayon ka’g kiha?” sa abogado. “Di na lang kay nakabawos na ko. Isipon ko nalang nga usa ka challenge ang akong nadawat nga mensahe. Kay kun hatagan ko tog importansiya, di na ko ka-concentrate sa akong review para sunod nga exams ni Dante. “Very good. Mao gyud nay akong itambag nimo, kun wa pa nimo mahunahuna” sa abogado. Ug nakig-apir ang abogado sa iyang empleyado. (Kataposan) (Sa gusto’g libreng kunsulta, dad-a ning pahina sa opisina sa tagsulat. Sa Sabado sa buntag)