Ang sinugdanan anaa sa kataposan

Gula 82

Ang nakapait kay dili manubag si Jack sa kahimtang ni Alexa. Atua na si Jack sa Amerika. Misibat kini pagkasayod nga nagsabak si Alexa kay dili kini interesadong mangasawa sa maguwang ni Colleen.

“Nagbunga na ang imong pagpakabuang niadtong lalakiha, Alexa,” gahot sa ilang Papa Omer nga labihang sukua. “Miresulta gyud og dili maayo ang sobra mong pagsalig niadtong lalaki nga way batasan.”

Wala lang magtingog si Alexa. Nagduko kini nga naghilak sa atubangan sa ilang amahan.

“Mao na kini ang resulta sa imong pag-agap og bahandi,” midason sa pagsudya ang ilang Mama Isabel. “Nagtuo ka nga maharuhay ang imong kahimtang kun si Jack ang imong mabana. Apan hain na man siya karon? Igo ka lang gipahimuslan.”

Si Colleen mibati og tumang kaluoy sa iyang maguwang. Apan nasayod siyang wala siya’y mahimo aron pagtabang unta sa iyang igsuon. Mao nga nagpabilin lang siyang nagbarog nga daw nahalansang sa may pultahan sa iyang lawak. Naghinan-aw na lang siya sa iyang ate Alexa nga gitabangan og kasaba sa ilang mga ginikanan.

Tungod ba kaha sa grabeng kahisagmuyo ug dili makadawat sa kahimtang ni Alexa, gihinginlan ang maguwang ni Colleen sa ilang mga ginikanan. Gikahikugang pag-ayo ni Colleen ang desisyon sa ilang mga ginikanan.

Apan nakasabot siya sa hinungdan. Nasuko pag-ayo ang ilang mga ginikanan sa nahitabo sa iyang maguwang. -- Sumpayan pa