Maunongon Ang Gugma

Gula 26

Nakapangalot si Jeffrey sa iyang ulo bisan wala’y katol. Layo na ra ba kaayo gikan sa iyang nahimutangan ang payag. Apan kinahanglang mobalik siya ngadto aron pagkuha sa iyang cellphone.

Napahunong si Jeffrey sa paglakaw sa dihang nagsingabot na siya sa payag. Nakamatikod siya nga may tawo sa tugkaran sa payag. Kalit kaayong mikuba ang iyang dughan. Tingalig mga polis ang anaa sa payag.

Miipli si Jeffrey sa dakong punoan sa bagalnga dungan ang paglanit sa iyang .45 kalibreng pistola. Wala siya mokompiyansa. Kun mga polis man ang anaa sa tugkaran sa payag nga posibleng nakasunod kaniya, dili gayod siya magpadakop nga buhi kanila. Mosukol siya hangtod sa kataposan niyang gininhawa.

Naniid si Jeffrey. Iyang gisuta kun pila ka tawo ang anaa sa tugkaran sa payag. Ug natino niya nga usa ra ka tawo ang naglakawlakaw sa tugkaran sa payag. Unya nakugang siya dihang iya kining nailhan. Si Danica!

Misamot pagkuba ang dughan ni Jeffrey. Nahibulong siya kun nganong mibalik si Danica dinhi sa payag nga ilang gikatulgan kagabii.

Wala una siya mogawas sa iyang gitagoan. Naniid siya sa palibot. Iyang gisuta kun wala bay mga kauban si Danica. Misantop man gud sa iyang hunahuna ang katahap nga tingalig mitaho na si Danica ngadto sa kapolisan kun hain siya ug gitultolan sila sa dalaga sa iyang nahimutangan.-- Sumpayan pa