Maunongon ang gugma

Wala siya’y laing tumong sa iyang pagpuga gikan sa bilanggoan gawas sa pagpaningil kang Brandon. Pabayron niya kini’g mahal sa gihimo niini sa iyang hinigugma.

Nagpadayon si Jeffrey sa paglakaw subay sa masiot nga kasagbotan. Paghimuntog niya sa nahawan nga dapit sa bungtod, mihunong siya. Milantaw siya ngadto sa habig sa sidlakan. Iyang nasuta nga layo na gayod kaayo ang dapit nga iyang naabot. Dili na gani niya mabanabana kun asa nga lungsod sa Cebu nahisakop ang dapit nga iyang nahimutangan karon.

Gikapkap niya ang bolsa sa iyang karsones aron kuhaon ang iyang cellphone. Buot niyang sutaon kun may signal ba sa dapit nga iyang nahimutangan karon. Pero nakugang siya ug kalit lang gikulbaan. Wala sa iyang bulsa ang cellphone.

Nawagtang ang iyang cellphone? Gisulayan niya’g hinumdom kun diin mawala ang maong butang. Dili mahimong mawala kaniya ang iyang cellphone tungod kay mahinungdanon kaayo kini alang kaniya. Na-phonebook sa iyang cellphone ang contact number sa mga tawo nga gituohan niyang makatabang kaniya, ilabi na gayod ang kanhi niyang opisyal nga si Col. Vince Noot.

Gipuga gayod og maayo ni Jeffrey ang iyang utok sa paghinumdom kun diin posibleng nahibilin o nawani ang iyang cellphone. Tuod, nahinumdoman ra gyud niya. Tua kini sa luyo sa hagdanan sa payag. Kagabii sa dihang gibati na siya’g duka, iyang gibutang ang iyang cellphone sa luyo sa hagdanan sa dayon na niyang katulog. -- Sumpayan pa