Maunongon Ang Gugma

Gula 24

Iyang gilantaw ang iyang padulngan. Unya milingi na usab siya sa iyang gigikanan. Nagduhaduha siya karon kun mopadayon ba siya ngadto sa iyang adtoan.

Nagpadayon si Jeffrey sa walay tumong niyang pagbaktas taliwala sa lapad nga kalasangan. Igo lang niyang gihapit ang iyang bag nga nahibilin sa payag ug midali siya pagbiya sa maong dapit. Milakaw siya nga wala’y pihong adtoan.

Wala siya’y plano nga magpabilin sa payag nga gikatulgan nila ni Danica kagabii. Sayon ra siyang tultolon sa mga tinugyanan sa balaod didto. Wala niya kapahimangnoi si Danica nga dili motug-an sa kapolisan kun hain siya. Ug bisan pa kaha’g iya pa kining gibaroan, nakaseguro siyang mosumbong gayod si Danica sa mga awtoridad kun hain siya magtago. Nasayod siyang nasuko si Danica kaniya gumikan sa gihimo niyang pag-hostage niini.

Mao nga samtang wala pa makasumbong si Danica sa kapolisan, mipalayo na siyang daan sa maong dapit. Moadto siya sa dapit nga maglisod na gayod ang mga awtoridad sa paggukod kaniya.

Dili hinuon dumalayon kining iyang pagtago-tago sa kabukiran. Nagpalinaw-linaw lang siya. Kun sa iyang paniid ingon sa wala na maghingusog ang kapolisan sa pagpangita kaniya, molusad na siya sa patag aron manimalos kang Brandon Mercado nga maoy nakaingon sa kamiserable sa iyang kinabuhi karon. -- Sumpayan pa