Ang ukulele ni Jimmy

Noy Pedong, bisa’g kinsay imong ipares nako isip leading lady sa drama nga ipasundayag atol sa novenario sa atong patron, basta ayaw lang na si Sheila!” pangugat hangyo ni Jimmy.

“Ayaw ko’g balibari Jim, kay sukad ko na presidente sa atong kapilya karon pa ko mohangyo nimo. Dili man sab na bintahaan si Sheila, kay gawas nga maanyag maayo sab nga dramatorga sa bantawan,” sumpay ni Pedong dayong agbay ni Jimmy nga nagkulismaot ang nawong nga gibalibaran.

Bugtong anak si Jimmy sa magtiayong insi Loling ug ingko Pindoy. Gawas nga gi-ila siyang maayong dramatorgo sa ilang lungsod, maayo usab siyang mogitik og ukelele. Ambongan si Jimmy ug sa iningles pa “tall dark and handsome.” Gidungog usab siya nga palikero nga way habas, kay digamohon gyud bisa’g bati’g nawong. Apan nasungo ang pagka chickboy ni Jimmy, dihang gibastid siya ni Sheila nga maoy labing maanyag nga dalaga sa ilang baryo Lapukon. Nabaniog sa tibuok baryo nga waa sugta si Jimmy ni Sheila.

Gitakda ni Pedong nga ang kalingawan sa unang gabii sa novenario mao ang drama nga pagahimoon diha sa plaza diin ang entablado mahimutang.

“Oy Shiel, naunsa ka gud nga nag Biyernes Santo man nang imong hitsura! Karong gabii na baya ang inyong drama ni Jimmy,” matud ni Lucing nga iyang silingan.

“Ambot lang ani nang Lucing oy, nga waa man gyud koy amor anang dramaha. Ilabi nang gipares ni noy Pedong nako kang pelikerong daku nga si Jimmy!” sumpay ni Sheila nga nangyam-id.

“Nahibawo ko Sheil nga duna kay pagtingin ni Jimmy, gani lang” waa makatiwas si Lucing ug gikidhata’g salabtunon si Sheila ug dayong bahakhak og katawa.

“Oy dili gyud na mahitabo nang Lucing! bisa’g pun-an pa nag haus and lot!” pangugat tubag ni Sheila. “Tinuod nangulitawo si Jimmy nako apan wa ko na sugta ug waa nako motingog ana niya duha na ka tuig ang milabay” sumpay ni Sheila nga nagkulismaot ang nawong. “Bantay baya ha tingalig!” waa matiwas ang salabtunong sulti ni Lucing nga nagkatawang mibiya ni Sheila. “Motan-aw ko’s inyong labok karong gabii!” singgit ni Lucing nga pina-igat.

Pagkatapos sa pangadye, nisamot kadaghan ang mga usisiro aron pagsaksi sa leading man ug leading lady sa drama nga waa magtinagdanay. Sa dihang nagsugod na ang drama, misamot kadasok ang mga tawo. Tuod, sa unang akto sa drama, si Sheila, ang leading lady dili moharung og tan-aw ni Jimmy, ang leading man, dihang gidigahan siya sa gugma niini basi sa script.

Apan sa ikaduhang akto sa drama, mosugot na ang leading lady sa leading man suma sa script, unya mag-gakos. Dinhi misuliyaw ang katawhan sa kahimuot kay sa pagsugot gayud sa leading lady sa leading man, gikupogan gilayon ni Jimmy si Sheila ug gi-lips to lips og hawok nga wa gyud ka-alma si Sheila nga nakalitan.

Milugnot si Sheila apan gisano-sano hinoon og hawok ang tibuok nawong, ug sa dihang gimodmod na ni Jimmy ang iyang simod gikan sa li-og paingon na unta sa ugdong dughan ni Sheila, kalit kining nakabuhi ug midagan paingon sa back stage nga naghilak!

“Giunsa man nimo si Sheila Jim nga naghilak man ug dili na mogawas sa iyang esena? Unsaon naman ini ron? Dili mahuman ang drama?” gikasab-an si Jimmy ni Pedong ang writer-direktor.

“Nisubay lang ko’s imong script noy Pedong aron paghatag og kinabuhi sa akong papel sa drama” mubong tubag ni Jimmy. Samtang sa ngilit sa back-stage si Sheila nagpa-agas sa iyang mga luha ug madungog kaayo ang pinugngang bakho. Dili na gyud unta mahuman ang drama ug dili pa ang hugot nga hangyo sa katawhan ug sa iyang mga kauban.

Pagka-buntag, sayong nag-kape si Pedong ug si Jimmy.

“Abi nimo Jim, gihimo ko ang pag-pares ninyo ni Sheila sa drama tungod sa sugyot sa imong inahan gumikan sa iyang kabalaka nga kanunay kang himatikdang maghinuktok sukad gibastid ang imong gugmang gihalad ngadto ni Sheila” nagkatawang mitug-an si Pedong.

“Gi-drama lang diay ko ninyo ni mama noy Pedong ha! Samot nang wala na ko’y paglaum sa gugma ni Sheila tungod sa nahitabo sa drama gabii! Di na gyud na motingog nako hangtud sa hangtud! Aw, ok lang total nakagakos ug nakahawok naman ko niya gabii ug atubangan pa gyud sa publiko!” matud ni Jimmy nga mipahiyom.

“Korek ka dyan!” dason ni Pedong nga mitukiki og katawa. “Ugaling lang, nagpabirig-birig ang baye tungod kay gidungog kang palikero ug mangtas sa mga babaye” sumpay ni Pedong nga nilambi ang ngabil og katawa.

“Dili ka pareha nako nga sa dihang gibastid ko ni Lucing, aw ako sad siya dayong gibuwagan! Tan-awon tag kinsay mabiyaan sa tren kay lapas na raba ming duha sa kalendaryo” matud ni Pedong nga mibahakhak og katawa. Wa pa gani matunga ang kape nga ilang giinom miabot si Lucing nga mapahiyumon.

“Kanang Jim, ug kalugar ka kono, ingon ni Sheila, patudlo siya ug ukelele nimo.Naa siya anang dakung puno-an sa mangga naghuwat,” sumpay ni Lucing dayong kusnit sa abaga ni Pedong.

Diriyot mayabo ang kape ni Pedong sa iyang nadungog, dungan ang pagkablit ni Jimmy sa dapi-dapi nga salabtonon kaayo. Nibawos sad og kidhat si Jimmy ug tungod sa kalipay, nagkaratolratol pag-ilis og karsones, ug gikuha ang ukelele nga gisab-ong sa bong-bong ug way pupananghid, misutoy og lakaw sagol dagan paingon sa dakung puno-an sa mangga diin si Sheila naghuwat.

“Hoy Jimmy! Basi’g manambo ang cobra kay wa nimo kasirhi ang siper sa imong karsones!” singgit ni Pedong nga mibahakhak og katawa dayong gakos ni Lucing. (Kataposan)