Kalit nausab

Dear Tita Salie,

Hello! My name is Jessa, single ug 21 years of age na. Duna koy boyfriend nga usa ka army ug bisan asa nalang siya ma-assign.

Sa una dihang layo pa siya, kadtong na-assign siya sa Bicol panagsa ra gayod mi magkita. Text ug tawag ra gayod sa cellphone ang among communication. Maayo nalang kun mobakasyon siya dinhi sa Sugbo kay magkasulti mi sa personal.

Wala gayod koy mahinumdoman nga higayon nga nag-away mi. Sweet kaayo siya sa phone sa text ug kun magkita mi during his vacation. Malipayon kaayo ming duha.

Karon niuli siya dinhi sa Sugbo kay namatay ang iyang inahan. Ug sukad niadto ania na siya sa Sugbo nagpadestino. Ug nalipay kaayo ko kay anaa naman siya kanunay sa akong duol. Puyde ko siyang makita kada adlaw.

Apan dako nakong kahibulong kay kalit man siyang nausab. Saputon na siya kaayo og kanunay lang ko niyang awayon. Labihan usab siya kaseloso. Dili siya mosugot nga makigsulti ko og laing lalaki. Kun iya kong makit-an nga dunay kaestoryang lalaki iya dayon kong dudahan nga may uyab nga lain.

Unsa may akong buhaton, Tita?Palihog pasabta ko. Daghang salamat and more power. -- Jessa

* * *

Dear Jessa,

Atong makompara ang tawong panagsa ra nato makit-an ug sa tawo nga kanunay natong makauban. Ato kanang mahulagway sa usa ka amiga ug usa ka tawo nga kauban nato sa pamilya.

Kun magkita ta sa atong amiga, kanunay lang kita nga nagkatawa. Kaha tungod kay lahi man ang tema sa atong estorya kompara sa tawong kanunay natong makita o miyembro sa pamilya kay sa mga problema apil na siya.

Dihang layo pa ang imong boyfriend syempre dili pa kaayo seryoso ang inyong kinabuhi kay panagsa ra magkita, busa ang nindot gayod nga batasan ang atong ipakita kun kamo magkuyog o mag-estorya sa phone. Lahi kun anaa na siya sa imong duol o kanunay na nimong makauban kay imo gayod siyang mailhan, ang tinuod niyang batasan.

Ang pagkaseloso dili kana tungod kay duna kay nahimong milagro, kondili tungod kana sa iyang pagkatawo. Wala gayod siya’y salig sa tawo. Mao nga bisan kun wala kay anomaliya apan para niya may gibuhat ka. Ug bisan unsaon nimo pagbinuotan dili lang gihapon siya matambalan. Kay siya ra mismo ang makatabang kaniya. Mas maayo kun imo lang siyang hinay-hinayon pagpakig-estorya. -- Tita Salie