Ang sinugdanan anaa sa kataposan

Gula 76

Nahikatawa si Cody. “Ngano ba gyud nga sa matag invite nako nimo’g pangaon, mangutana ka man gyud kun duna bay okasyon?”

“Siyempre. Dili gud ni mahitabo sa tanang panahon.”

“Hinuon, husto ka. Ug niining tungora, tukma ang imong pangagpas.”

“U-unsay buot mong ipasabot?”

“Tinuod nga may gamay’ng okasyon karon maong gidapit tikaw.”

“Birthday nimo?”

Milingolingo si Cody. “Migawas na ang resulta sa board exam. Usa ko sa nakapasar. Mao nga gusto kong makig-share nimo sa bisan sa labing simple nga paagi sa akong kalamposan.”

“Congratulations,” ni Colleen pa. “Usa ka na gayod ka hingpit nga magtutudlo.”

“Oo,” ni Cody pa. “Kun makatrabaho na unya ko, asawa na lay kuwang nako.”

Wala motubay si Colleen sa ulahing gisulti ni Cody. Nahinumdom siya sa gidangatan sa relasyon nila ni Cody ug sa iyang ate Alexa.

“Gawas niana,” matud ni Cody, “may lain pa kong tuyo kun nganong gi-invite tikaw og dinner karon. Ug kini ang mas importante.”

“Unsa kana?” -- Sumpayan pa