Duha ka Sugilanon

Oy, naghasol paman ka Mare Luding sa paghatod sa amoa ning biko ug pansit. Unsa may okasyon diay sa inyo ron?” pangutana ni Lucy ngadto sa iyang silingan nga kumare.

“Ada, birthday ron nako oy ug hapit na gani molapas ang akong edad sa kalendaryo,” tubag pa ni Luding.

Managsilingan silang duha sa taud-taod nang panahon. Gumikan niini, kumare nalang ang ilang tawag sa usa’g-usa. Ang bana ni Luding nga si Botsoy maoy mangunay sa pagmaneho sa ilang usa ka buok jeep de pasaheroan kansang rota gikan sa ilang dapit padulong sa lungsod.

Panahon sa Pasko, manghatag og pinaskohan si Luding ngadto sa mga kabataan sa ilang dapit sama sa t-shirt, dulaan o mga sinsilyo ba hinoon.

Kugihan siya kay mangluto siya og mga pagkaon alang sa iyang mga suki nga mga factory workers sa usa ka establisamento dili layo sa ilang dapit. Wala tugahi og anak sila si Luding ug Botsoy gumikan lagi sa pagka-sterile sa naawahi.

Usa ka gabii niana, samtang nagpaabot si Luding kang Botsoy nga hapit na mograhe kalit miabot si kumare niya Lucy.

“Mare Luding, ania lagi ko kay manghulam unta ko og kuwarta para kunsomo namo nga ipalit og bugas kay naospital man si Pedring gumikan sa inom,” pamahayag pa ni Lucy.

“Aw, way problema, aniay kinyentos pesos. Ayaw na lang nig hunahunaa kay tabang lang ni nako sa inyo,” sulti pa ni Luding nga inubanan sa pahiyom.

“Salamat Mare ug ang Diyos na lang ang mahibalong mobalos sa imong kaayo sa isigkatawo,” pasalamat ni Lucy ug dayong talikod kay magpalit pa siya og bugas alang sa kunsomo nila uban sa lima ka buok anak.

Dili lisod duolon si Luding kay madali rang malukmay ang iyang balatian kun adunay mohangyo kaniya nga magpatabang og manghulam ba hinoon og kuwarta. Apan may sakit diay si Luding nga iya lang gidala-dala sa dugay nang panahon nga mao ang breast cancer kon kanser sa totoy.

Pilay estorya, na-admit siya sa ospital ug wala dangtig dugay namatay kay naabot na sa stage 4 ang iyang balatian nga giantos. Naguol ug nahinugnan ang mga silingan lakip na sa ubang mga tawo nga nakaila kaniya.

“Pastilan, maayong tawo raba to si Luding ug sayon ra natong duolon. Daklit man ang iyang kamatayon, nakatuaw si Etang nga suod higala sa magkumare.

“Gawas niana, manggihatagon pa gyud na siya,” sumpay pa ni Layding nga natabangan ni Luding sa pagpalit og tambal alang sa masakiton niyang anak tulo ka bulan na ang milabay.

Busa, daghan ang mga tawo ang nahinugnan kun ang tawo nga mamatay maayo’g taras ug batasan samtang buhi pa siya, apan kun siya estrikto, maldito og kinaiya ug dili pa gyud kaduolan og tawo panahon sa panginahanglan daghan ang moyobit ug manghimaraot kaniya pinaagi sa pag-ingon, “mirisi, patay na lagi ka!”. (Katapusan)