Ang sinugdanan anaa sa kataposan - Gula 75

“Mao gyu’y husto,” ni Cody pa. “Tingpaniudto na gyud nang orasa.”

“Asa ta mag-abot?”

“Sa Orange Brutus sa may Plaza Fair. Mag-una na lang ko nimo didto.”

“Okey.”

Nakita dayon ni Colleen nga naglingkod atubangan sa usa ka lamesa nga nahimutang dapit sa suok nga bahin sa kan-anan sa iyang pagsulod. Iya dayon kining giduol. Si Cody maoy unang mitimbaya kaniya.

“Kaganina ka ra ba?” Nangutana si Colleen.

“Dili pa gyud dugay,” maoy tubag. “Gibanabana ko lang nga hapit na mahuman ang imong klase aron dili ko magpaabot nimo’g dugay.”

Gibutang ni Colleen ang iyang mga gamit sa eskuylahan sa ibabaw sa lamesa ug milingkod sa atbang ni Cody.

“Unsay gusto mong orderon?” Sukit ni Cody.

“B-bisan unsa,” niya pa.

Mitindog si Cody ug miduol sa counter. Mi-order kini’g pagkaon alang kanila. Paglabay sa pipila ka gutlo, nahibalik na kini sa ilang lamesa nga nagdala na sa ilang pagkaon.

“Unsa bay okasyon niining imong pagdapit nako?” Nangutana si Colleen dihang nagsugod na sila’g pangaon. -- Sumpayan pa